पोखरा,
नेपाली कांग्रेसको १५औँ महाधिवेशनमा कास्की क्षेत्र नं.३ बाट ३५ वर्षमुनिको युवा समूहअन्तर्गत केन्द्रीय महाधिवेशन प्रतिनिधि पदका लागि युवा नेता ठाकुर बरालले आफ्नो उम्मेदवारी प्रस्तुत गर्ने तयारी गर्नुभएको छ। ‘युवा शक्ति र परिवर्तनका एजेन्डा लिएर अगाडि बढौँ’ भन्ने नारासहित बरालले महाधिवेशन प्रतिनिधिका रूपमा आफूलाई अघि सार्नुभएको हो।
पार्टीभित्र नयाँ पुस्ताको सहभागिता र उपस्थिति बढाउनुपर्ने आवश्यकता औँल्याउँदै उहाँले आफ्नो राजनीतिक यात्रालाई नीतिगत सुधार, नेतृत्व हस्तान्तरण र पार्टी रूपान्तरणसँग जोड्नुभएको छ। बरालले युवालाई पार्टीको संगठनमा मात्र होइन, नीति निर्माण र निर्णय प्रक्रियामै अर्थपूर्ण रूपमा सहभागी गराउनुपर्ने धारणा राख्नुभएको छ। उहाँका अनुसार बदलिँदो राजनीतिक, सामाजिक र आर्थिक परिवेशअनुसार नेपाली कांग्रेसले पनि आफ्नो संगठन, कार्यशैली र नीतिमा समयानुकूल सुधार गर्दै अघि बढ्न आवश्यक छ।
राष्ट्रिय लोकतन्त्रलाई थप सुदृढ गर्दै समृद्धिको लक्ष्य हासिल गर्न नेपाली कांग्रेसले नयाँ पुस्ताको ऊर्जा, क्षमता र सिर्जनशीलतालाई उपयोग गर्नुपर्ने उहाँको भनाइ छ। युवा पुस्ताको नेतृत्व विकासलाई प्राथमिकतामा राख्दै बरालले अग्रज पुस्ताको अनुभव र नयाँ पुस्ताको ऊर्जा बीचको समन्वयबाट पार्टीलाई थप गतिशील बनाउन सकिने बताउनुभएको छ। उहाँले अग्रजहरूको योगदान र संघर्षबाट प्राप्त राजनीतिक अनुभवलाई सम्मान गर्दै त्यसबाट सिकेर नयाँ पुस्तालाई नेतृत्वका लागि तयार पार्नुपर्नेमा जोड दिनुभएको छ।
“युवा शक्ति र परिवर्तनका एजेन्डा लिएर अगाडि बढौँ” भन्ने मूल भावका साथ अघि बढेका बरालले कांग्रेसलाई समयअनुकूल र जनमुखी बनाउने बहसमा युवाको आवाजलाई प्रभावकारी रूपमा स्थापित गर्न आफूले भूमिका खेल्न चाहेको बताउनुभएको छ। उहाँको उम्मेदवारीको मुख्य जोड युवाको सहभागिता, नेतृत्व हस्तान्तरण, नीतिगत सुधार र संगठनको रूपान्तरणमा केन्द्रित रहेको छ।
नेपाली कांग्रेसको १५औँ महाधिवेशन नजिकिँदै जाँदा विभिन्न तहमा युवा पुस्ताबाट नेतृत्वका आकांक्षाहरू सार्वजनिक हुन थालेका छन्।
