काठमाडौं,
कप्तान लियोनल मेसीको प्रेरणादायी प्रदर्शनमा अर्जेन्टिना फिफा विश्वकप २०२६ को नकआउट चरणमा प्रवेश गरेको छ। समूह ‘जे’ अन्तर्गत मंगलबार बिहान सम्पन्न खेलमा अर्जेन्टिनाले अष्ट्रियालाई २–० ले पराजित गर्दै लगातार दोस्रो जित निकालेको हो।
अमेरिकाको डालास स्टेडियममा भएको खेलमा मेसीले दुवै गोल गर्दै टोलीको जित सुनिश्चित गरे। उनले ३८औँ मिनेटमा गोल गर्दै अर्जेन्टिनालाई अग्रता दिलाएका थिए भने दोस्रो हाफको इन्जुरी समयमा व्यक्तिगत दोस्रो गोल गर्दै जित पक्का गरे। यस जितसँगै अर्जेन्टिनाले दुई खेलबाट ६ अंक जोड्दै समूहको शीर्ष स्थानमा आफूलाई बलियो बनाएको छ। अष्ट्रिया ३ अंकसहित दोस्रो स्थानमा छ भने जोर्डन र अल्जेरिया अंकविहीन छन्।
तर यो खेल केवल अर्जेन्टिनाको जितमा सीमित रहेन। दुई गोलसहित मेसीले विश्वकप इतिहासमा सर्वाधिक गोल गर्ने खेलाडीको नयाँ कीर्तिमान पनि कायम गरे। उनले आफ्नो विश्वकप गोल संख्या १८ पुर्याउँदै जर्मनीका मिरोस्लाभ क्लोजको १६ गोलको पुरानो कीर्तिमानलाई पछि पारे। २००६ मा विश्वकपमा डेब्यु गरेका ३८ वर्षीय मेसी अहिले आफ्नो छैटौँ विश्वकप खेलिरहेका छन्। यसअघि अल्जेरियाविरुद्धको खेलमा ह्याट्रिक गर्दै उनले क्लोजको कीर्तिमान बराबरी गरेका थिए भने अष्ट्रियाविरुद्ध दुई गोल थप्दै एकल कीर्तिमान बनाए।
विश्वकपमा सर्वाधिक खेल खेल्ने, सर्वाधिक जित निकाल्ने, दुई पटक गोल्डेन बल जित्ने तथा सर्वाधिक प्लेयर अफ दि म्याच अवार्ड हात पार्ने कीर्तिमान समेत मेसीकै नाममा छन्। अब उनले गोलको नयाँ उचाइसँगै आफ्नो महान यात्रालाई अझ ऐतिहासिक बनाइरहेका छन्। यस्तो लाग्छ, मेसी कीर्तिमानको पछि दौडिरहेका छैनन्, बरु कीर्तिमान नै उनलाई पर्खिरहेका छन्। विश्व फुटबलका महानायकले हरेक खेलसँगै इतिहासका नयाँ अध्याय लेखिरहेका छन्।
