दीननाथ बराल,
पोखरा, २६ माघ,
नेकपाका उम्मेदवार किरण बहादुर थापा (हेम) ले जेन्जी आन्दोलनपछि मुलुकले असल नेतृत्वको खोजी गरिरहेको अवस्थामा नेकपा नेतृत्व, निकास र विकासको स्पष्ट रणनीतिका साथ जनता माझ आएको बताउनु भएको छ । सोमबार पोखरा महानगरपालिका वडा नम्बर १६ स्थित नेकपाको सम्पर्क कार्यालय उद्घाटन गर्दै उहाँले मुलुक हाल अभिभावक विहीन जस्तो अवस्थामा पुगेको टिप्पणी गर्नुभयो ।
उम्मेदवार थापाले कुनै समय नेपाली कांग्रेसका सभापति गिरिजाप्रसाद कोइरालाले देशको अभिभावकत्व गर्दै नेतृत्व सम्हालेको स्मरण गर्दै वर्तमान अवस्थामा त्यो जिम्मेवारी नेकपाका संयोजक पुष्पकमल दाहाल ‘प्रचण्ड’ को काँधमा आएको दाबी गर्नुभयो । उहाँले केपी शर्मा ओलीको दम्भ, घमण्ड र भड्काउ अभिव्यक्तिका कारण देश आज गम्भीर संकटतर्फ धकेलिएको आरोप लगाउनुभयो । सम्पूर्ण वामपन्थी शक्तिलाई एकताको सूत्रमा बाँध्ने जिम्मेवारी नेकपाले लिने उल्लेख गर्दै उहाँले प्रजातान्त्रिक शक्तिहरूबीच पनि एकता आवश्यक रहेको धारणा राख्नुभयो । मुलुकको जातजाति, भाषा, धर्म र संस्कृतिको संरक्षणका लागि राष्ट्रिय अभिभावकत्व गर्न सक्ने बलियो शक्ति आवश्यक रहेको र त्यसको विकल्प प्रचण्ड मात्रै भएको उहाँको भनाइ थियो ।
जेन्जी पुस्ताले बगाएको रगत खेर जान नदिने प्रतिबद्धता व्यक्त गर्दै उम्मेदवार थापाले आन्दोलनका सम्पूर्ण माग सम्बोधन गर्ने बाटोमा आफूहरू अग्रसर भएको बताउनुभयो । त्यसका लागि जनताले अमूल्य मत दिनुपर्ने भनाइ थियो ।
देशमा विकास र समृद्धिका लागि सुशासन पहिलो शर्त भएको उल्लेख गर्दै उम्मेदवार थापाले सुरक्षित लगानी वातावरण नहुँदा काठमाडौँ र लेकसाइडका केही व्यवसायीहरू दुबईलगायत मुलुकतर्फ लगानी पलायन गर्न थालेको खुलासा गर्नुभयो । युरोपसम्म नेपाली पूँजी पलायन हुँदा युवा शक्ति पनि स्वतः विदेशिन थालेको उहाँको तर्क थियो । पूँजी र युवामात्र होइन, राष्ट्रिय भावना नै पलायन हुने अवस्थामा पुगेकोप्रति उहाँले चिन्ता व्यक्त गर्नुभयो । यहाँको पूँजी र युवा शक्तिलाई स्वदेशमै परिचालन गर्ने रणनीतिक योजनासहित आफूहरू अगाडि आएको दाबी गर्दै उहाँले निर्वाचित भएमा संसदमा ताली बजाउन मात्र नभई जनताको आवाज र आवश्यक विकास पूर्वाधारमा सशक्त भूमिका निर्वाह गर्ने प्रतिबद्धता जनाउनुभयो ।
सम्पर्क कार्यालय नेकपाको भए पनि यसलाई जनताका लागि निर्वाचन आचारसंहिता, जानकारी र सचेतनाको केन्द्र बनाइने बताउँदै उहाँले कांग्रेस, एमाले, रास्वपा र राप्रपालगायत प्रतिस्पर्धी दलका घोषणापत्र र प्रतिबद्धता अध्ययन गरेर विवेकपूर्ण रूपमा अमूल्य मत दिन सबै मतदातालाई आग्रह गर्नुभयो । कार्यक्रममा समानुपातिक उम्मेदवार ज्ञानु आचार्यसहितको टोलीको सहभागिता रहेको थियो । साथै कांग्रेस, एमाले तथा रास्वपाका नेताहरूले समेत कार्यक्रम नजिकबाट अवलोकन गर्नु भएको थियो । कार्यक्रमको सञ्चालन नेकपाका युवा नेता विपिन आचार्यले गर्नुभएको थियो ।
