पोखरा, ३ कार्तिक,
सत्य युवा सेवा समिति पोखरा–१३ को आयोजनामा २१औँ कालरात्रि सांगीतिक साँझ महाअष्टमीको दिन पोखरामा भव्य रूपमा सम्पन्न भएको छ । स्थानीय कला, संस्कृति र प्रतिभाको प्रवर्द्धनसँगै सामाजिक सेवाको सन्देश प्रवाह गर्ने उद्देश्यले आयोजना गरिएको कार्यक्रममा युवाहरूको उल्लेखनीय सहभागिता रहेको थियो ।
पोखरा–१३ स्थित भद्रकाली चोक क्षेत्रमा आयोजित सांगीतिक साँझमा विभिन्न सांगीतिक प्रस्तुति, सांस्कृतिक कार्यक्रम तथा विविध गतिविधिले दर्शकलाई मनोरञ्जन प्रदान गरेको थियो । कार्यक्रमका कारण राति १२ बजेसम्म पनि बाजापाटन क्षेत्रमा चहलपहल कायम रहेको थियो । स्थानीय युवा, सर्वसाधारण तथा संगीतप्रेमीहरूको उपस्थितिले कार्यक्रमस्थल उत्साहपूर्ण बनेको थियो । कार्यक्रममा स्वर ब्याण्ड, शैलु राई ब्याण्ड र दृश्य ब्याण्डको सांगीतिक प्रस्तुतिले दर्शकलाई मनोरञ्जन प्रदान गरेका थिए । त्यस्तै, गुरुकुल विद्या सदनका विद्यार्थीहरूले प्रस्तुत गरेको ‘कर्णाली ड्रिम्स’ ले पनि कार्यक्रमको आकर्षण बढाएको थियो । विभिन्न संस्कृति झल्काउने स्टल, सांस्कृतिक प्रस्तुति तथा विशिष्ट व्यक्तित्वको सम्मान कार्यक्रमका थप आकर्षण बनेका थिए ।
कार्यक्रमका होस्ट आयुष श्रेष्ठ र शोभा केसीले आफ्नो आकर्षक प्रस्तुति तथा दमदार उद्घोषणमार्फत दर्शकलाई कार्यक्रमसँग जोडेर राखेका थिए । सांगीतिक प्रस्तुतिमा रमाउँदै युवादेखि ज्येष्ठ नागरिकसम्मका दर्शकले कार्यक्रमको आनन्द लिएका थिए ।
विसं २०४६ मा स्थापना भएको सत्य युवा सेवा समितिले शिक्षा, स्वास्थ्य, खेलकुद तथा सामाजिक सेवाका क्षेत्रमा निरन्तर काम गर्दै आएको छ । समितिले विपन्न तथा आवश्यकतामा रहेका विद्यार्थीलाई छात्रवृत्ति प्रदान गर्ने, स्वास्थ्य शिविर सञ्चालन गर्ने, रक्तदान तथा जनचेतनामूलक कार्यक्रम आयोजना गर्ने लगायतका सामाजिक कार्य गर्दै आएको छ । समितिले भद्रकाली माध्यमिक विद्यालयमा ‘बी–१३ छात्रवृत्ति’ कार्यक्रममार्फत पाँच लाख रुपैयाँ बराबरको सहयोग गरेको छ । त्यस्तै, ‘१३ के रन’ तथा ‘बी–१३ रन’ आयोजना, बास्केटबल कोर्ट निर्माण तथा संरक्षण, खेलकुदका पूर्वाधार विकास, पुनर्वासमा सहयोग, कृत्रिम खुट्टा प्रत्यारोपण र विपद्मा परेका नागरिकलाई राहत वितरणजस्ता काममा समेत योगदान दिँदै आएको छ ।
रसुवाका बाढी प्रभावितलाई राहत वितरणदेखि पोखरा–१३ को वडा कार्यालय पुनर्निर्माणमा सहयोग, माछापोखरी प्रहरी चौकीमा ट्र्याकसुट वितरण तथा रोजगारी मेलामा सहयोगी संस्थाका रूपमा सहभागिता जनाएर समितिले सामाजिक उत्तरदायित्व निर्वाह गर्दै आएको छ । समितिले विसं २०६१ देखि कालरात्रि सांगीतिक साँझ आयोजना गर्दै आएको हो । यस वर्ष २१औँ संस्करणसम्म आइपुग्दा यो कार्यक्रम स्थानीय कला, संस्कृति र प्रतिभा प्रस्तुत गर्ने महत्वपूर्ण अवसरका रूपमा स्थापित भएको छ । सामाजिक सेवासँगै सांस्कृतिक गतिविधिलाई जोड्दै आएको समितिले कालरात्रि साँझलाई समुदायबीच आपसी सद्भाव, सहकार्य र सम्बन्ध सुदृढ गर्ने माध्यमका रूपमा लिएको छ ।
समितिका अध्यक्ष हितमान गुरुङले सामाजिक सेवाका गतिविधिसँगै स्थानीय कला, संस्कृति र प्रतिभाको संरक्षण तथा प्रवर्द्धन गर्ने उद्देश्यले कालरात्रि सांगीतिक साँझलाई निरन्तरता दिइएको बताए । उनले युवाहरूको उत्साहजनक सहभागिताले सामाजिक अभियानमा थप ऊर्जा मिलेको उल्लेख गरे । त्यस्तै, कार्यक्रम संयोजक लुमप्रसाद गुरुङले सांगीतिक कार्यक्रममार्फत स्थानीय प्रतिभालाई अवसर प्रदान गर्नुका साथै समुदायलाई एकै ठाउँमा जोड्ने प्रयास गरिएको बताए । सचिव महेश आचार्यले स्थानीय कलाकार तथा ब्याण्डहरूको प्रस्तुतिले कार्यक्रमलाई थप आकर्षक बनाएको उल्लेख गर्दै कार्यक्रम सफल बनाउन सहयोग गर्ने सम्पूर्ण व्यक्ति तथा संस्थाप्रति आभार व्यक्त गरे ।
समितिका अध्यक्ष हितमान गुरुङ, कार्यक्रम संयोजक लुमप्रसाद गुरुङ, सचिव महेश आचार्यलगायतको नेतृत्वमा कार्यक्रम तथा समितिका सामाजिक गतिविधिहरू सञ्चालन हुँदै आएका छन् । शिक्षा, स्वास्थ्य, खेलकुद, संस्कृति र सामाजिक सेवालाई एकीकृत गर्दै अघि बढिरहेको समितिले आगामी दिनमा पनि समुदायको आवश्यकता पहिचान गरी सामाजिक अभियानलाई थप प्रभावकारी बनाउने लक्ष्य लिएको छ । २१औँ कालरात्रि सांगीतिक साँझले पोखरा–१३ को सांस्कृतिक पहिचानलाई उजागर गर्नुका साथै युवा सहभागिता र सामुदायिक एकताको सन्देश दिएको छ ।
