दीननाथ बराल,
पोखरा, १३ माघ,
मोबाइल चलाउँदा आएको एउटा सन्देश, अनलाइनमा देखिएको एउटा लोभलाग्दो अफर वा कसैले मागेको एउटा ओटीपीले तपाईँको वर्षौंको कमाइ एकैछिनमा गुम्न सक्छ । कास्कीमा पछिल्लो समय अनलाइन ठगीको ग्राफ तीव्र गतिमा उकालो लाग्दै जाँदा धेरै सर्वसाधारणदेखि शिक्षित, व्यापारी र कर्मचारीसम्म करोडौं रुपैयाँ गुमाउन बाध्य भएका छन् ।
जिल्ला प्रहरी कार्यालय कास्कीका अनुसार चालु आर्थिक वर्षको हालसम्म अनलाइन ठगीसँग सम्बन्धित ६ सय ७ वटा उजुरी परेका छन्, जसमा करिब १९ करोड १९ लाख ५० हजार रुपैयाँभन्दा बढी ठगी भएको दाबी गरिएको छ । यो तथ्यांकले तपाईँको आर्थिक सुरक्षा अब केवल बैंक वा पसलमा सीमित नरही मोबाइल र इन्टरनेटसम्म फैलिएको स्पष्ट संकेत गर्छ ।
प्रहरीको भनाइमा, तपाईँलाई छिटो नाफा हुने, चिठ्ठा परेको, अनलाइन सपिङको बहाना बनाउने वा विदेशबाट आएको पार्सल भन्सारमा रोकिएको भन्दै पैसा झिक्ने गिरोह सक्रिय छन् । सामाजिक सञ्जाल र दर्ता नभएका एप्समार्फत हुने यस्ता ठगी नियन्त्रण गर्नु चुनौतीपूर्ण बन्दै गएको छ । जिल्ला प्रहरी कार्यालय कास्कीका प्रमुख एसपी नवीन कार्कीका अनुसार तपाईँ ठगिनुको मुख्य कारण लोभ नै हो । “धेरैजसो घटना हेर्दा नपढेकाभन्दा पढेका मान्छे बढी फसेका छन्,” उहाँले भन्नुभयोे, “तपाईँले गरेको लगानी वा नाफाको कुरा छिमेकीलाई पनि नबताउँदा अन्ततः ठूलो आर्थिक क्षति बेहोर्नुपरेको छ ।”
प्रहरीले तपाईँलाई अनलाइन कारोबार गर्दा सतर्क रहन, अपरिचित व्यक्तिको कुरा विश्वास नगर्न र शंकास्पद गतिविधि देखिएमा तुरुन्त प्रहरीमा जानकारी दिन आग्रह गरेको छ । तपाईँको सानो लापरबाहीले ठूलो आर्थिक संकट निम्त्याउन सक्छ भन्ने यथार्थ कास्कीका पछिल्ला तथ्यांकले प्रस्ट देखाएका छन् । पोखरामा हालै आयोजित एक कार्यक्रममा वोल्दै एसपी कार्कीले व्यक्तिका गोप्य फोटो र भिडियो सार्वजनिक गरिदिन्छु भन्दै धम्क्याउने र पटक–पटक पैसा असुल्ने प्रवृत्ति पनि उत्तिकै बढ्दो रुपमा रहेको दाबी गर्नुभयो । पोखरा उद्योग वाणिज्य संघका अध्यक्ष गोकर्ण कार्कीले अनलाइन ठगीबाट जोगिन प्रहरी–समुदाय हातेमालो र सचेतनामूलक कार्यक्रम आवश्यक रहेकोमा जोड दिनुभयो । पोखरा जेसिजका अध्यक्ष सुमन पहारीले लोभमा नफस्न र अनलाइन ठगीबाट जोखिन आफ्ना सूचनाहरु जोगाउन आग्रह गर्नुभयो ।
