दीननाथ बराल
पोखरा १७, असोज
पोखराको हेमजामा यस बर्ष सातौं संस्करणको अन्तर्राष्ट्रिय हेमजा गोल्डकप आमन्त्रित नकाउट फूटबल प्रतियोगिता २०८० आउँदो कार्तिक ११ गते देखि हुने भएको छ । पोखरा २५ स्थित हेमजा युनाइटेडकोे आयोजनामा आउँदो कार्तिक ११ देखि १८ गतेसम्म हेमजाको गौरीशंकर खेल मैदानमा उक्त प्रतियोगिता हुने भएकोे संस्थाका अध्यक्ष राजेश त्रिपाठीले बताउनु भयो ।
प्रतियोगितामा एक विदेशी सहित नेपालका ए डिभिजका ८ टिमको सहभागिता हुने तयारी अनुमान गरिएको अध्यक्ष त्रिपाठीले बताउनु भयो । कम्तिमा एक विभागिय टोली समेत सहभागि हुने गरी आन्तरिक तयारी गरेको उहाँको भनाई छ ।
प्रतियोगितामा विजेताले ६ लाख ५५ रुपैया र उपविजेताले ३ लाख ५५ रुपैया साथमा शिल्ड, मेडल र प्रमाणपत्र पुरस्कार प्रदान गरिने भएको प्रतियोगिताका आर्थिक संयोजक महादेव अधिकारीले बताउनु भयो । प्रतियोगितामा सर्वोत्कृष्ट खेलाडीलाई ५० हजार, संर्वाधिक गोलकर्तालाई २५ हजार, अनुशासित टोलीलाई २५ हजार प्रदान गरिने भएको छ । प्रतिोगितामा उत्कृष्ट स्टाइकर, उत्कृष्ट मिडफिल्डर, उत्कृष्ट डिफेण्डर, उत्कृष्ट गोलरक्षक र उत्कृष्ट प्रशिक्षक गरी ५ विधाका खेलाडीहरुलाई जनही २०÷२० हजार पुरस्कार प्रदान गरिने भएको छ । हरेक खेलको म्यान अफ दी म्यानलाई ५ हजार नगद सहित पुरस्कार प्रदान गरिने भएको छ ।
उक्त गोल्डकप हेमजाको गौरव भएकोले यसमा सबै क्षेत्रको सहयोग आवश्यक भएको अध्यक्ष त्रिपाठीले बताउनु भयो । ७ दिन चल्ने प्रतियोगिता सम्पन्न गर्न करिब ५८ लाख ८४ हजार खर्च लाग्ने भएको छ भने प्रतियोगिताबाट ७० लाख आम्दानी गर्ने लक्ष्य राखिएको आर्थिक संयोजक अधिकारीले बताउनु भयो । युवा एकता र विकासका लागि खेलकुद भन्ने नाराका साथ आयोजना गर्र्न लागिएको प्रतियोगिताबाट बचत रकम ४० प्रतिशत रकम हेमना यूनाइटेड एकेडेमी सञ्चालानार्थ खर्च गरिने भएको छ भने बाँकी रकम प्यारापिट निर्माणमा लगायतका सामाजिक कार्यमा खर्च गरिने भएको सचिव सूनिल गायकले बताउनु भयो । संस्थाको अगुवाईमा उक्त गोल्ड कप सम्पन्न गर्न चरणवद्ध रुपमा स्थानिय क्लव, आमा समुह लगायतसंग छलफल भई रहेको संस्थाले जनाएको छ ।
