काठमाडौं ,
प्रधानमन्त्री वालेन्द्र शाहले कीर्तिपुरस्थित त्रिभुवन विश्वविद्यालय (टियू) क्रिकेट मैदानमा नेपाल प्रिमियर लिग (एनपीएल) को तेस्रो संस्करण उद्घाटन गर्नुभएको छ। प्रधानमन्त्री शाहले अम्पायरलाई बल हस्तान्तरण गर्दै प्रतियोगिताको उद्घाटन गर्नुभएको हो। उहाँले उद्घाटन खेलको पहिलो इनिङ्ससमेत मैदानमै बसेर हेर्नुभएको थियो।
तेस्रो संस्करणको उद्घाटन खेलमा साविक विजेता लुम्बिनी लायन्सले सुदूरपश्चिम रोयल्सलाई ७ विकेटले पराजित गर्दै प्रतियोगितामा विजयी सुरुआत गरेको छ। सुदूरपश्चिमले दिएको ८८ रनको सामान्य लक्ष्य लुम्बिनीले ९ ओभर ५ बलमा ३ विकेट गुमाएर पूरा गरेको हो।
लुम्बिनीको जितमा ओपनर डार्सी सर्ट र आसिफ शेखले आक्रामक ब्याटिङ गर्दै टोलीलाई सहज जिततर्फ डोर्याउनुभयो। पहिलो विकेटका लागि यी दुईले ७१ रनको साझेदारी गरेका थिए। सर्टले १८ बलमा ४ चौका र ३ छक्काको मद्दतमा सर्वाधिक ४० रन बनाउनुभयो। आसिफले २५ बलमा २ चौका र २ छक्कासहित ३२ रन जोड्नुभयो। सर्ट अनिल खरेलको बलमा आउट हुनुभयो भने आसिफ पनि खरेलकै बलमा पवेलियन फर्किनुभयो।
निरोशन डिक्वेला ७ रनमा बोल्ड हुनुभयो। शमिम हुसेन १ रनमा आउट हुँदा कप्तान रोहित पौडेल ५ रनमा अविजित रहनुभयो।बलिङतर्फ सुदूरपश्चिमका अनिल खरेलले २ तथा कप्तान दीपेन्द्रसिंह ऐरीले १ विकेट लिनुभयो। तर, लुम्बिनीका ओपनरले दिएको तीव्र सुरुआत रोक्न सुदूरपश्चिमको बलिङ आक्रमण सफल भएन।
८७ रनमै समेटियो सुदूरपश्चिम
यसअघि टस हारेर पहिले ब्याटिङ गरेको सुदूरपश्चिम रोयल्स १७ ओभर २ बलमा ८७ रनमा समेटिएको थियो। टोलीका कप्तान दीपेन्द्रसिंह ऐरीले सर्वाधिक २७ रन बनाउनुभयो। उहाँले २३ बलमा २ चौका प्रहार गर्नुभयो। सैफ जैबले १३ तथा अनिल खरेलले अविजित १७ रन जोड्नुभयो। अन्य ब्याटरले उल्लेखनीय योगदान दिन नसक्दा सुदूरपश्चिमले सामान्य योगफलमै चित्त बुझाउनुपर्यो। सुदूरपश्चिमलाई सस्तैमा समेट्ने क्रममा लुम्बिनीका किशोर महतोले ४ विकेट लिनुभयो। शेर मल्लले ३ विकेट लिँदा कप्तान रोहित पौडेल, तिलकराज भण्डारी र स्याड्ली भान शाल्कवाइकले १–१ विकेट लिनुभयो।
उद्घाटन खेलमा डीआरएसको प्रयोग
तेस्रो संस्करणको अर्को आकर्षण निर्णय पुनरावलोकन प्रणाली (डीआरएस) को प्रयोग पनि रह्यो। खेलका क्रममा लुम्बिनीले गरेको एलबीडब्लू अपिलमा अम्पायरले आउट नदिएपछि कप्तान रोहित पौडेलले डीआरएस लिनुभएको थियो। तर, उक्त पुनरावलोकनमा लुम्बिनी सफल हुन सकेन।
उद्घाटन खेलमा अन्तर्राष्ट्रिय अनुभव भएका खेलाडीको उपस्थिति, दर्शकको सहभागिता र नयाँ प्रविधिको प्रयोगले प्रतियोगितालाई थप चासोपूर्ण बनाएको थियो। यद्यपि, पहिलो इनिङ्समा सुदूरपश्चिमले अपेक्षाकृत कम रन बनाएपछि दर्शकले ठूलो स्कोरको प्रतीक्षा गर्नुपरेको थियो। दोस्रो इनिङ्समा भने लुम्बिनीका ओपनरले आक्रामक ब्याटिङ गर्दै खेललाई छिट्टै निष्कर्षमा पुर्याए।
प्रतियोगिताअन्तर्गत मंगलबार दुई खेल हुनेछन्। पहिलो खेलमा दिउँसो साढे १२ बजे विराटनगर किंग्स र चितवन राइनोजबीच प्रतिस्पर्धा हुनेछ भने दोस्रो खेल साँझ ५ बजे कर्णाली याक्स र जनकपुर बोल्ट्सबीच हुनेछ। प्रधानमन्त्री शाहले उद्घाटन गर्नुभएको एनपीएलको तेस्रो संस्करणको पहिलो खेलमै साविक विजेता लुम्बिनीले जित निकाल्दै उपाधि रक्षा अभियानको सुरुआत गरेको छ।
