पोखरा,
५० दिनअघि नेपाली संगीतको धुन बोकेर उत्तर अमेरिकातर्फ उडेको कन्दरा अब त्यही यात्राको स्मृति र उपलब्धि बोकेर आफ्नै शहर फर्किँदैछ। ब्यान्डका संस्थापक सदस्य तथा प्रमुख गायक बिवेक श्रेष्ठ र ड्रमर तथा संगीतकार सुनील थापा लामो सांगीतिक यात्रापछि पोखरा फर्किन लागेका हुन्।
तर यसपटक उनीहरूको घरफिर्ती सामान्य छैन। आफ्नै जन्मथलो पोखराको अन्तर्राष्ट्रिय विमानस्थलबाट सुरु भएको नयाँ अन्तर्राष्ट्रिय व्यावसायिक उडानमार्फत अवतरण गर्ने पहिलो समूहका यात्रुमध्ये उनीहरू पनि रहनेछन्। उत्तर अमेरिकाका विभिन्न शहरमा नेपाली संगीत प्रस्तुत गर्दै बिताएका ५० दिनपछि पोखराकै आकाश हुँदै घर फर्किन पाउनु श्रेष्ठ र थापाका लागि संयोगमात्र नभई भावनात्मक क्षण बनेको छ। “५० दिनसम्म उत्तर अमेरिकाका विभिन्न शहरमा नेपाली संगीत लिएर हिँडेर आफ्नै पोखराको आकाश हुँदै घर फर्किन पाउनुको खुसी शब्दमा व्यक्त गर्न गाह्रो छ। त्यसमाथि पोखरा अन्तर्राष्ट्रिय विमानस्थलको यो ऐतिहासिक सुरुवातसँगै पहिलो समूहका यात्रुमध्ये भएर फर्किन पाउनु हाम्रो लागि अविस्मरणीय संयोग हो,” श्रेष्ठले भने।
कन्दरा टोलीका लागि यो यात्रा केवल विदेशमा कार्यक्रम गर्ने र फर्किने यात्रामा सीमित छैन। नेपाली संगीतलाई प्रवासमा रहेका नेपाली समुदायसम्म पुर्याएर उनीहरू फेरि त्यही संगीतको धुन बोकेर आफ्नो शहर फर्किरहेका छन्। त्यसैले उनीहरूको यो घरफिर्तीमा अर्को अर्थ पनि जोडिएको छ—विश्वका शहरमा नेपाली गीत सुनाउँदै हिँडेको एउटा ब्यान्ड अब पोखरालाई नै आफ्नो अन्तर्राष्ट्रिय आगमनको पहिलो गन्तव्य बनाउँदैछ। दुबई–पोखरा सीधा व्यावसायिक उडान सुरु भएसँगै पोखरा अन्तर्राष्ट्रिय विमानस्थल अन्तर्राष्ट्रिय हवाई सञ्जालसँग प्रत्यक्ष जोडिने क्रमले नयाँ गति लिएको छ। नयाँ हवाई सम्पर्कले पोखरासहित पश्चिम नेपालमा पर्यटन, व्यापार तथा अन्तर्राष्ट्रिय आवागमन विस्तारका सम्भावना बढाउने अपेक्षा गरिएको छ।
यही नयाँ अध्यायको सुरुवाती यात्रामा कन्दरा पनि यात्रुका रूपमा जोडिँदैछ। नेपाली संगीतलाई लिएर उत्तर अमेरिकाका शहरसम्म पुगेको कन्दरा अब पोखराको अन्तर्राष्ट्रिय विमानस्थल हुँदै आफ्नै माटोमा फर्किँदैछ। एकातिर विदेश यात्राको पूर्णविराम, अर्कोतिर पोखराको अन्तर्राष्ट्रिय उडान इतिहासमा नयाँ सुरुवात—कन्दराको यसपटकको घरफिर्ती यी दुई घटनाको रोचक संगम बनेको छ।
