काठमाडौं,
सगरमाथाको साहस, चुनौती, जलवायु परिवर्तन र मानवीय संघर्षलाई समेटिएको वृत्तचित्र ‘रोड टु एभरेस्ट’ को अफिसियल ट्रेलर सार्वजनिक भएको छ । निर्मल श्रेष्ठको निर्देशनमा बनेको ५० मिनेट लामो वृत्तचित्रमा ५० वर्ष नाघेका राज गुरुङको सगरमाथा आरोहण यात्रालाई मुख्य कथाका रूपमा प्रस्तुत गरिएको छ। वृत्तचित्रमा कीर्तिमानी आरोही फुर्वा तेन्जिङ शेर्पा र निमा ग्याल्जेन शेर्पासहित अन्य सहयात्रीहरू पनि देखिनेछन्।
दुई वर्षको अनुसन्धान तथा निर्माणपछि तयार भएको वृत्तचित्र नेपाली र अंग्रेजी दुवै भाषामा निर्माण गरिएको छ। सञ्चारकर्मी सन्तोष आचार्य र निर्मल श्रेष्ठले कथा लेखेका हुन् भने भूषण दाहालले आवाज दिएका छन्। निर्माण पक्षका अनुसार वृत्तचित्रको नेपाल प्रिमियर भदौ ६ गते काठमाडौंमा र अन्तर्राष्ट्रिय प्रिमियर भदौ २८ गते हङकङमा हुनेछ। ‘वि विल राइज फाउण्डेसन’द्वारा निर्मित वृत्तचित्रले नेपालको पर्यटन प्रवर्द्धनसँगै हिमाली क्षेत्रमा जलवायु परिवर्तनको प्रभावबारे विश्वव्यापी ध्यानाकर्षण गराउने उद्देश्य राखेको छ।
