काठमाडौं, पुस २०,
पछिल्लो तीन दशकको नेपाली खेलकुद इतिहास पल्टाउँदा कुन खेल हाबी रह्यो को–को खेलाडी चम्किए रु यसको एकमुस्ट उत्तर खोज्न अन्यत्र जानु पर्दैन, एनएसजेएफ–पल्सर स्पोर्ट्स अवार्डको इतिहास हेरे पुग्छ ।
वर्ष खेलाडी पुरस्कारका रूपमा २०५३ सालमा सुरु भएको यो अवार्ड २०८२ साल आइपुग्दा २२औँ संस्करणमा प्रवेश गरेको छ, जुन यसपालि पोखरामा आयोजना हुँदैछ । हरेक वर्ष उत्कृष्ट प्रदर्शन गर्ने खेल र खेलाडीलाई केन्द्रमा राख्दै आएको यस अवार्डले नेपाली खेलकुदको समग्र प्रवृत्ति देखाउँदै आएको छ ।
उत्कृष्ट पुरुष खेलाडी अवार्ड जित्ने खेलाडीहरूको सूची हेर्दा आफैंमा रोचक र सनसनीपूर्ण तथ्यहरू देखिन्छन् । खेलकुदमा तथ्यांकको कथा जहिल्यै बेजोड हुने गर्छ । अहिलेसम्म आयोजना भएका २१ संस्करणमध्ये २०७७ साल विशेष रह्यो, किनभने त्यस वर्ष दशककै उत्कृष्ट खेलाडीको अवार्ड प्रदान गरिएको थियो । त्यसलाई छाडेर प्रत्येक संस्करणमा नछुटेका दुई अवार्डमध्ये एक उत्कृष्ट पुरुष खेलाडी पनि रहेको छ ।
तथ्यांकका आधारमा हेर्दा हालसम्म १५ खेलाडीले यो अवार्ड जितेका छन् । तीमध्ये क्रिकेटका पारस खड्का एक्लैले चार पटक अवार्ड जित्दै सबैभन्दा अगाडि छन् । उनले पहिलो पटक २०६६ सालमा अवार्ड जिते । त्यसपछि २०६९ र २०७० सालमा लगातार जिते भने २०७४ सालमा अन्तिम पटक यो सम्मान प्राप्त गरे । यही कारण २०७७ सालमा उनलाई दशककै उत्कृष्ट खेलाडीको अवार्ड प्रदान गरिनु पूर्णतः न्यायोचित मानिन्छ । यसले पछिल्ला वर्षहरूमा नेपाली खेलकुदमा उनको वर्चस्व कति बलियो थियो भन्ने पनि प्रस्ट पार्छ ।
पारसपछि एथलेटिक्सका राजेन्द्र भण्डारी र तेक्वान्दोका दीपक विष्टले दुई–दुई पटक वर्षको उत्कृष्ट पुरुष खेलाडीको अवार्ड जितेका छन् । दीपक विष्ट त नेपाली खेलकुद इतिहासकै सबैभन्दा सफल खेलाडीका रूपमा चिनिन्छन् । एक–एक पटक यो अवार्ड जित्नेमा फुटबलका देवनारायण चौधरी, जुमनु राई, नवयुग श्रेष्ठ, किरण लिम्बू र अञ्जन विष्ट छन् । क्रिकेटबाटै अर्को खेलाडी विनोद दासले पनि यो अवार्ड जितेका थिए । पछिल्लो संस्करणमा क्रिकेटकै रोहित पौडेल वर्षको उत्कृष्ट पुरुष खेलाडी बनेका थिए ।
राजेन्द्र भण्डारीपछि एथलेटिक्सबाट लामो समयको अन्तरालमा दीपक अधिकारी यो विधाको विजेता बने । यसबाहेक बक्सिङका दीपक महर्जन, गल्फका शिवराम श्रेष्ठ, प्याराग्लाइडिङका युकेश श्रेष्ठ र करातेका मन्डेकाजी श्रेष्ठले पनि एक–एक पटक यो अवार्ड हात पारेका छन् । खेलको आधारमा हेर्दा क्रिकेटले छ पटक र फुटबलले पाँच पटक यो अवार्ड जितेका छन् । एथलेटिक्सले तीन पटक, तेक्वान्दोले दुई पटक अवार्ड आफ्नो नाममा लेखाएको छ । बक्सिङ, गल्फ, प्याराग्लाइडिङ र करातेले भने एक–एक पटक मात्र यो सम्मान जित्न सकेका छन् ।
यसपालि अवार्ड गण्डकी प्रदेशमा आयोजना हुँदैछ । पोखरेली खेलाडी युकेश गुरुङ पोखराको विशेष खेलको पहिचान बोकेको प्याराग्लाइडिङबाट उत्कृष्ट खेलाडी बनेका हुन् । उनको टोलीले इन्डोनेसियामा आयोजित एसियाली खेलमा पदक जितेको थियो ।यसपालि वर्षको उत्कृष्ट पुरुष खेलाडीका लागि क्रिकेटका कुशल भुर्तेल र दीपेन्द्र सिंह ऐरी, टेबलटेनिसका स्यान्टु श्रेष्ठ, खो–खोका जनक चन्द र उसुका विजयसिंजाली दाबेदार रहेका छन् । अब हेर्न बाँकी छ, अन्ततः कसले बाजी मार्ला !
