पोखरा, २८ मंसिर,
गण्डकी प्रदेशको पहिलो रेफरेन्स ल्याब युनाइटेड रेफरेन्स ल्याबोरेटरी प्रालि (युआरएल) ले आफ्नो १२औँ वार्षिकोत्सवको अवसरमा शनिबार पोखरास्थित युआरएल हस्पिटल चोकमा निःशुल्क स्वास्थ्य शिविर आयोजना गरेको छ । शिविरमा २ सय ५ जनाले ल्याब परीक्षण सेवा लिएका छन् भने ५२ जनाले दन्त परीक्षण सेवा लिएका छन् । युआरएलका मार्केटिङ डाइरेक्टर मणि न्यौपानेका अनुसार शिविरमा सहभागीको थाइराइड तथा मधुमेह (सुगर) सम्बन्धी जाँच निःशुल्क गरिएको थियो ।
२०७० साल मंसिर २३ गते स्थापना भएको युआरएलले १२औँ वार्षिकोत्सवको अवसरमा मंसिर १५ गतेदेखि मंसिर मसान्तसम्म विभिन्न सेवामा विशेष छुटसमेत उपलब्ध गराउँदै आएको जनाएको छ । युआरएलका अध्यक्ष ठाकुरप्रसाद पन्थले वार्षिकोत्सवको उपलक्ष्यमा स्वास्थ्यप्रति सचेतना अभिवृद्धि गर्दै सर्वसाधारणलाई गुणस्तरीय सेवा प्रदान गर्ने उद्देश्यले कार्यक्रम आयोजना गरिएको बताउनुभयो । उहाँका अनुसार युआरएलले स्थापनाकालदेखि नै आफैं तथा विभिन्न संघ–संस्थासँगको सहकार्यमा निःशुल्क स्वास्थ्य शिविरहरू सञ्चालन गर्दै आएको छ । हालसम्म आयोजना गरिएका २१२ वटा शिविरमार्फत करिब २ लाख १५ हजार जनाले निःशुल्क सेवा लिइसकेका छन् ।
शिविरका क्रममा पोखरा स्वास्थ्य विज्ञान प्रतिष्ठानका कन्सल्टेन्ट फिजिसियन डा. कृष्णराज अधिकारीले कसरत नगर्ने बानी र अस्वस्थ खानपानले मधुमेहको जोखिम बढाउने बताउनुभयो । उहाँका अनुसार थाइराइडको समस्या हुँदा महिनावारी गडबडी, मोटोपनालगायतका स्वास्थ्य समस्या देखिन सक्छन् । डा. अधिकारीले वंशानुगत कारणले पनि मधुमेह हुन सक्ने उल्लेख गर्दै नियमित व्यायाम, सन्तुलित आहार र स्वस्थ जीवनशैली अपनाएमा यस्ता रोगबाट बच्न सकिने स्पष्ट पार्नुभयो । ‘सुगरका कारण आँखाको समस्या, दाँत बिग्रने तथा यौन दुर्बलतासमेत हुन सक्ने अध्ययनले देखाएको छ,’ उहाँले भन्नुभयो, ‘कम्तीमा वर्षमा एक पटक पूर्ण शरीर जाँच गरेमा रोग प्रारम्भिक चरणमै पत्ता लगाउन र समयमै उपचार गर्न सहयोग पुग्छ।’
कपडा व्यवसायीलाई युआरएलमा छुट
यसैबीच कपडा व्यवसायी एसोसिएसन कास्कीमा आबद्ध व्यवसायीले पोखरा–८ न्यूरोडस्थित युआरएलको प्रधान कार्यालय तथा यसका शाखाबाट ३० प्रतिशत छुट पाउने भएका छन् । संस्थामा आबद्ध कपडा व्यवसायी र उनीहरूका आश्रित परिवारका सदस्य (आमाबुवा, छोरा–छोरी, श्रीमान–श्रीमती तथा सासु–ससुरा) ले ल्याब परीक्षण सेवामा उक्त छुट सुविधा पाउने छन् ।उक्त सम्झौता पुस १ गतेदेखि २०८५ मंसिर मसान्तसम्म, अर्थात् तीन वर्षका लागि लागू हुने जनाइएको छ । आइतबार युआरएलका अध्यक्ष ठाकुरप्रसाद पन्थ र कपडा व्यवसायी एसोसिएसन कास्कीका अध्यक्ष लेखनाथ पौडेलबीच सम्झौतामा हस्ताक्षर भएको छ ।
