दीननाथ बराल,
पोखरा २९, साउन,
यस बर्ष लगातार जसो बर्षा हुँदा कास्की सहित गण्डकी प्रदेशका अन्य जिल्लामा ९७.५० प्रतिशत धान रोपाई सम्पन्न भएको छ । यही साउन २७ गतेको तथ्याङको आधारमा गण्डकी प्रदेशमा ९७.५० प्रतिशतले ९३ हजार ६ सय ५१ हेक्टर क्षेत्रफलमा धान रोपाई सम्पन्न भएको गण्डकी प्रदेशको कृषि बिकास निर्देशनालयले पोखराक्लिकलाई जनाएको छ ।
यस बर्ष गण्डकी प्रदेशका दुई जिल्ला लमजुङ र म्याग्दीमा शतप्रतिशत धान रोपाई भएकोे गण्डकी प्रदेशको कृषि बिकास निर्देशनालयका कृषि प्रसार अधिकृत एवं सूचना अधिकारी विनोद शर्माले बताउनु भयो । गण्डकी प्रदेशमा ४ लाख ७९ हजार ६ सय १७ हेक्टर क्षेत्रमा खेतियोग्य जमिन रहेकोमा बर्षे धान रोप्न योग्य क्षेत्रफल भने ९६ हजार ५३ हेक्टर मात्र जमिन रहेको उहाँले जनाउनु भयो ।
गण्डकी प्रदेशका ११ जिल्ला मध्य हिमालपारीका दुई जिल्ला मनाङ र मुस्ताङमा धान खेति खासै हुने गरेको छैन् । प्रदेशका ९ जिल्ला मध्य हालसम्म दुई जिल्ला लमजुङ र म्याग्दीमा शतप्रतिशत धान रोपाई भएको छ भने नवलपरासि र गोर्खामा ९४ प्रतिशत मात्र धान रोपाई भएको उहाँले जनाउनु भयो ।
गोर्खामा १० हजार १ सय ४० हेक्टर क्षेत्रफलमा धान रोपाई हुदै आएको छ भने हालसम्म ९४.३० प्रतिशत धान रोपाई भएको कार्यालयले जनाएको छ । लमजुङमा ११ हजार ८ सय ७५ हेक्टरमा र म्याग्दीमा पनि शतप्रति धान रोपाई हुँदा ३ हजार ७ सय ४१ हेक्टर क्षत्रफलमा धान रोपाई भएको छ ।
त्यस्तै तनहुँमा ९९.०० प्रतिशतले ७ हजार ५ सय ९७ हेक्टर क्षेत्रफलमा धान रोपाई भएको छ भने कास्कीमा ९८.९६ प्रतिशतले १६ हजार ५० हेक्टर क्षेत्रफलमा धान रोपाई भएको कार्यालयका कृषि अधिकृत रन्जना पोखरेलले पोखराक्लिकलाइ बताउनु भयो ।
पर्वतमा ९९.०० प्रतिशतले ७ हजार ४ सय ५०, स्याङजामा पनि ९९.०० प्रतिशतले १४ हजार २ सय ४६ र बागलुङमा ९७ प्रतिशतले ५ हजार ५ सय ३६ हेक्टर क्षत्रफलमा धान रोपाई भएको उहाँले जनाउनु भयो । कास्कीमा प्रायः गरी जेठोबुढो, पहेले, एक्ले, खुमल ४, १०, गौरिया, बयर्नी, सेतो र लामो भिनुवा, मार्सी, बिरिमफुल, कालो र टुंडे झिनुवा, वर्णशंकर–यू एस ३१२ लगायतका जातका धान खेति हुदै आएको छ ।
