दीननाथ बराल,
पोखरा २३, वैशाख,
“स्वास्थ्यको लागि खेलकुद राष्ट्रका लागि खेलकुद” भन्ने नाराका साथ महेन्द्रपुल युथ क्लवको आयोजनामा प्रथम यू–२३ बास्केटबल प्रतियोगिता यही वैशाख २८ देखि पोखरामा हुने भएको छ । पोखरा रंगशालामा हुने उक्त प्रतियोगिता यही वैशाख ३० गतेसम्म चल्ने भएको आइतबार पोखरामा आयोजित पत्रकार भेटघाट कार्यक्रममा जानकारी गराइएको हो ।
पोखरा महानगरपालिका वडा नम्बर ९ को सहयोगमा हुने प्रतियोगितामा विजेतालाई ४० हजार, उपविजेतालाई २५ हजारको साथमा शिल्ड, मेडल र प्रमाणपत्र वितरण गरिने भएको क्लवका अध्यक्ष आनन्दकुमार तत्रझ्या(काजी) ले बताउनु भयो । तीन दिन चल्ने प्रतियोगितामा करिब २० टिम सहभागि हुने भएको प्रतियोगिताका संयोजक सेजोल जोजिजुले बताउनु भयो । प्रतियोगितामा कास्की सहित पर्वत, म्याग्दी, बागलुङ लगायतबाट केही टिम दर्ता भएको उहाँले दाबी गर्नु भयो ।
२०३४ सालमा स्थापना भएको क्लव विगत बेड दशकजसो समय सुसुप्त अबस्थामा रहेको थियो भने अब क्लवले निरन्तर खेलकुद सहित सामाजि कार्यक्रम गर्दै जाने भएको सचिव राजु कायस्थले बताउनु भयो । सल्लाहकार बिद्या मर्सानीले अब यस क्लवका सदस्यहरु एक भई सामाजिक कार्यमा निरन्तर लाग्नुपर्नेमा जोड दिनुभयो । वक्सिङका खेलाडी बुद्ध गुभाजुले मैदान अभावले गर्दा क्लवले आफ्नो खेलकुद गतिविधि अघि बढाउन नसकेको जनाउनु भयो ।
