दीननाथ बराल,
पोखरा, ३० फागुन
पोखरामा सडकमा छाडिएका गाई–वस्तुको संरक्षण तथा सडक दुर्घटना न्यूनीकरणमा महत्वपूर्ण भूमिका खेलेको पुष्करिणी परोपकार गोकुलधामले तेस्रो वार्षिकोत्सवको अवसरमा श्रीमद् भागवत ज्ञान महायज्ञ आयोजना गर्ने भएको छ । पोखरा महानगरपालिका–१४ बाच्छीबुडुवामा रहेको गोकुलधाम परिसरमा चैत २ गतेदेखि महायज्ञ सञ्चालन गरिने जानकारी शनिबार आयोजित पत्रकार सम्मेलनमा जानकारी गराइएको हो ।
कार्यक्रमबारे जानकारी दिँदै उत्तः परियोजवानका परिकल्पनाकार एवं भागवत भाष्कर कमलनयन गौतमले महायज्ञमार्फत सङ्कलित सहयोग र दान रकम गौशालामा रहेका गाई–वस्तुको संरक्षण, पालनपोषण तथा गोकुलधामको पूर्वाधार विकासमा खर्च गरिने बताउनु भयो । पोखरा महानगरपालिकाको सहयोग र राष्ट्रिय परोपकार महासंघ नेपालको व्यवस्थापनमा सञ्चालन हुँदै आएको गोकुलधामले विगत तीन वर्षदेखि सडकमा वेवारिसे रूपमा छाडिएका गाई–वस्तु तथा वृद्ध, रोगी र अशक्त गाईहरूको उद्धार, आश्रय, उपचार, स्याहार तथा आहारको व्यवस्था गर्दै आएको उहाँले जनाउनु भयो । हाल गोकुलधाममा करिब ३ सय १५ वटा गाई, गोरु तथा बाच्छा–बाच्छी रहेका छन् । यहाँबाट दैनिक करिब ६० देखि ७० लिटर दूध उत्पादन हुँदै आएको गोकुलधामका संरक्षक तथा अध्यक्ष समेत रहनु भएको गौतमले बताउनु भयो । करिब २ सय रोपनी क्षेत्रफलमा फैलिएको यस परियोजनाले गाईको गोबर र गहुँत प्रयोग गरी अर्गानिक मल, गड्यौला मल तथा जैविक खेतीको प्रक्रिया पनि सुरु गरेको उहाँले दाबी गर्नुभयो ।
गोकुलधाम स्थापना भएपछि कास्की जिल्लामा सडकमा छाडिएका गाई–वस्तुका कारण हुने दुर्घटना उल्लेख्य रूपमा घटेको आयोजकको दाबी छ । यसअघि हरेक वर्ष ४–५ जनासम्म मानिस सडक दुर्घटनामा ज्यान गुमाउने गरेको जिल्ला ट्राफिक कार्यालयको तथ्यांक रहेको भए पनि गोकुलधाम सञ्चालनपछि यस्ता घटनामा उल्लेख्य कमी आएको गौतमले दाबी गर्नुभयो ।
पोखरा महानगरपालिकाले विगतमा भौतिक संरचना निर्माणका लागि वार्षिक ५० लाख रुपैयाँ सहयोग गर्दै आएको र चालु आर्थिक वर्षमा प्रदेश सरकारबाट एक करोड रुपैयाँ बजेट विनियोजन भएको जानकारी पनि उहाँले दिनुभयो । हालै खानेपानीको समस्या समाधान गर्न बोरिङ खनेपछि गोकुलधाममा पानीको अभाव हटेको राष्ट्रिय परोपकार महासंघ नेपालले पोखराक्लिकलाई जनाएको छ । आगामी दिनमा गोकुलधाम परिसरमा कृष्ण मन्दिर निर्माण, जडीबुटीका बिरुवा रोपण, योग–ध्यान साधना केन्द्र स्थापना, धार्मिक व्यक्तिहरूको बसोबासका लागि भवन निर्माण तथा प्रशासनिक कार्यालय व्यवस्थापन गर्ने योजना रहेको आयोजकले जनाएको छ । गोकुलधामलाई गौमाताको संरक्षण मात्र नभई अध्ययन, अवलोकन तथा आध्यात्मिक गतिविधिको केन्द्रका रूपमा विकास गर्ने लक्ष्य राखिएको छ ।
