दीननाथ बराल,
पोखरा २१, जेठ,
नेशनल स्पोट्र्स एकेडेमीको आयोजनामा यही जेठ २७ गते देखि पोखरा रंगशालामा हुने प्रचण्ड कप राष्ट्रिय महिला भलिवल प्रतियोगिताको तयारी पूरा भएको छ । पोखरा रंगशालाको कभर्डहलमा हुने उक्त प्रतियोगिताको तयारी पूरा भएको बुधबार पोखरामा आयोजित पत्रकार भेटघाट कार्यक्रममा जानकारी गराइएको हो ।
प्रतियोगितामा घरेलु टिम गण्डकी प्रदेश सहित ६ टिमको सहभागिता हुने भएको छ । प्रतियोगितामा तीन विभागिय त्रिभुवन आर्मी क्लब, नेपाल पुलिस क्लब र सशस्त्र प्रहरी बल, गण्डकी प्रदेश, न्यु डायमण्ड र एभरेष्ट भलिबल क्लब सहभागि हुने भएको एकेडेमीका अध्यक्ष दिपक कोइरालाले बताउनु भयो ।
प्रतियोगितामा विजेता टिमले ६ लाख रुपैयाँ, उपविजेताले ३ लाख, तेस्रो हुने टिमले १ लाख रुपैयाँको साथमा ट्रफी मेडल र प्रमाण पत्र प्राप्त गर्ने भएको छ । साथै उत्कृष्ट खेलाडीलाई ३० हजार र अन्य विधामा उत्कृष्ट प्रशिक्षक, सटर, ब्लकर, लिब्रो, सर्वर र स्पाइकर लगायत विभिन्न विधामा उत्कृष्ट हुनेलाईे जनही २० हजार रुपैयाँ पुरस्कार प्रदान गरिने भएको छ ।
नेपालको राष्ट्रिय खेल भलिबलको प्रवद्र्धन तथा विकासका लागि पोखरामा उक्त प्रतियोगिता यही जेठ ३१ गतेसम्म आयोजना हुने भएको अध्यक्ष कोइरालाले जनाउनु भयो । राष्ट्रिय खेलकुद परिषद् र नेपाल भलिबल संघको स्वीकृतमा वार्षिक कार्यक्रम अन्तर्गत हुन लागेको अध्यक्ष कोइरालाले जनाउनु भयो । ५ दिने चल्ने प्रतियोगिता सम्पन्न गर्न करिब ६० लाख रुपैयाँको खर्च हुने एकेडेमीले जनाएको छ । पुरस्कारमा मात्र ११ लाख ५० हजार खर्च हुने भएको छ । प्रतियोगिताका सम्पूर्ण खेलहरु फिभा र एनभिए को नियम अनुसार खेलाइने भएको छ भने राउण्ड रोविनको आधारमा खेल खेलाइने भएको छ ।
खेलाडीहरुलाई यातायात सहित आवासियको सुविधा एकेडेमीले उपलब्ध गराउने भएको उपाध्यक्ष शिव कोइराला(ज्वाला) ले बताउनु भयो । पोखरामा भलिवलको क्रेज भएकोले पहिलो पटक महिला भलिवल आयोजना गरिएको त्यस पश्चात पुरुष तर्फको समेत केही समय पछि गर्ने एकेडेमीको योजना रहेको उहाँले सुनाउनु भयो । २०७५ सालमा तत्कालिन प्रधानमन्त्री पुष्पकमल दाहाल प्रचण्ड नेतृत्वको सरकारले भलिवल खेललाइ राष्ट्रिय खेलको रुपमा घोषणा गर्नु भएको उपाध्यक्ष कोइरालाले जनाउनु भयो । उक्त अवसरमा नेपाल भलिवल संघका केन्द्रिय उपाध्यक्ष याम बहादुर गुरुङले भलिवल खेलको विकासको लागि यस्ता प्रतियोगिता आवश्यक भएकोमा जोड दिनुभयो ।
