पोखरा,
पोखरा र गण्डकी प्रदेशवासीका लागि खुसीको खबर छ । पोखरा अन्तर्राष्ट्रिय विमानस्थलबाट दुबईमा सिधा उडान सञ्चालन गरिरहेको अन्तर्राष्ट्रिय वायुसेवा कम्पनी फ्लाई दुबईले सन् २०२७ अक्टोबर ३० सम्मको टिकट बुकिङ खुला गरेको छ । कम्पनीले झन्डै एक वर्षअघिसम्मको बुकिङ खुलाएसँगै पोखरा–दुबई उडान नियमित रूपमा सञ्चालन हुने आशा थप बलियो बनेको छ । यसले पोखराका पर्यटन व्यवसायीमा समेत उत्साह थपेको छ ।
पोखरा अन्तर्राष्ट्रिय विमानस्थलबाट गत सेप्टेम्बर २३ देखि फ्लाई दुबईले उडान सञ्चालन गर्दै आएको छ । लामो अवधिसम्मको टिकट बुकिङ खुल्नुले पोखरा–दुबई हवाई सम्पर्कलाई निरन्तरता दिने संकेतका रूपमा हेरिएको छ । यद्यपि, बुकिङ खुल्दैमा सबै उडान निश्चित भएको वा हरेक दिन उडान हुने सुनिश्चितता भने हुँदैन ।
विमानस्थलको तथ्याङ्कअनुसार सेप्टेम्बर २३ देखि अक्टोबर १२ सम्मका २० दिनमध्ये १९ दिन उडान सञ्चालन भएको छ । एक दिन मौसम प्रतिकूल हुँदा उडान रोकिएको थियो । उक्त अवधिमा फ्लाई दुबईका उडानमार्फत ३ हजार ११३ जना यात्रु पोखरा आएका छन् भने १ हजार ४२३ जना पोखराबाट दुबई गएका छन् । दुवैतर्फका यात्रु जोड्दा कुल ४ हजार ५३६ यात्रुको आवागमन भएको देखिन्छ । पोखरा आएका यात्रुमध्ये २ हजार ८१५ जना नेपाली नागरिक, २८१ जना विदेशी नागरिक र १७ जना शिशु छन् । त्यसैगरी, पोखराबाट दुबई प्रस्थान गर्ने यात्रुमध्ये १ हजार २४८ जना नेपाली नागरिक, १७० जना विदेशी नागरिक र पाँच जना शिशु रहेका छन् ।
१९ दिनमा साढे चार हजारभन्दा बढी यात्रुको आवागमन
सेप्टेम्बर २३ देखि ३० सम्मको आठ दिनमा फ्लाई दुबईमार्फत १ हजार १०२ जना पोखरा आएका थिए भने ६६५ जना दुबई गएका थिए । अक्टोबर १ देखि १२ सम्मको १२ दिनमा पोखरा आउने यात्रुको सङ्ख्या २ हजार ११ पुगेको छ । यस अवधिमा पोखराबाट दुबई जाने यात्रुको सङ्ख्या ७५८ रहेको विमानस्थलको तथ्याङ्क छ ।
उडान सुरु भएको छोटो अवधिमै दुवैतर्फ यात्रुको आवागमन देखिनुले पोखरा–दुबई हवाई सेवाको सम्भावनालाई उजागर गरेको छ । विशेषगरी दुबई हुँदै अन्य अन्तर्राष्ट्रिय गन्तव्यमा जाने यात्रुका लागि पोखराबाटै सिधा उडानको सुविधा उपलब्ध हुनु महत्त्वपूर्ण मानिएको छ ।
पोखरा अन्तर्राष्ट्रिय विमानस्थलका प्रमुख जगन्नाथ निरौलाले पोखरा–दुबई सिधा उडानलाई पोखरालाई अन्तर्राष्ट्रिय हवाई सञ्जालसँग जोड्ने महत्त्वपूर्ण अवसरका रूपमा लिनुभएको छ । यस सेवाले पोखराको पर्यटन प्रवर्द्धन गर्नुका साथै अन्तर्राष्ट्रिय यात्रालाई सहज बनाउन सहयोग पुग्ने उहाँको अपेक्षा छ ।
एक वर्षको बुकिङले पर्यटन व्यवसायी उत्साहित
फ्लाई दुबईले सन् २०२७ अक्टोबर ३० सम्मको टिकट बुकिङ खुला गरेपछि पोखराका पर्यटन व्यवसायीमा थप आशा जागेको पोखरा पर्यटन परिषद्का पूर्वअध्यक्ष पोमनारायण श्रेष्ठले बताउनुभयो । लामो अवधिसम्म टिकट बुक गर्न सकिने व्यवस्थाले पोखरा–दुबई उडान निरन्तर सञ्चालन हुने विश्वास बढाएको उहाँको भनाइ छ । सिधा हवाई सम्पर्कले पोखरामा विदेशी पर्यटकको आवागमन बढाउन, पर्यटन व्यवसायलाई चलायमान बनाउन र अन्तर्राष्ट्रिय यात्रालाई सहज बनाउन सहयोग पुग्ने अपेक्षा गरिएको छ ।
दुबई विश्वकै महत्त्वपूर्ण अन्तर्राष्ट्रिय हवाई पारवहन केन्द्रमध्ये एक हो । पोखराबाट दुबईसम्म सिधा उडान उपलब्ध हुँदा त्यहाँबाट अन्य देश तथा सहरमा जाने यात्रुले काठमाडौं वा अन्य विमानस्थलसम्म पुग्नुपर्ने बाध्यता कम गर्न सक्नेछन् । यसले पर्यटक, व्यवसायी, वैदेशिक रोजगारीमा जाने यात्रु तथा विदेशमा रहेका नेपालीलाई समेत लाभ पुग्न सक्छ ।
अन्तर्राष्ट्रिय उडानको प्रतीक्षामा रहेको पोखरालाई नयाँ आशा
पोखरा अन्तर्राष्ट्रिय विमानस्थल सञ्चालनमा आएदेखि नै नियमित अन्तर्राष्ट्रिय उडानको अभाव र विमानस्थलको पूर्ण उपयोग हुन नसकेको विषय उठ्दै आएको छ । यस्तो अवस्थामा फ्लाई दुबईको सिधा उडान र लामो अवधिसम्मको टिकट बुकिङ खुल्नु पोखराको हवाई सम्पर्क विस्तारका लागि सकारात्मक घटनाक्रम बनेको छ ।
पोखरा प्राकृतिक सौन्दर्य, हिमाली दृश्य, तालतलैया र साहसिक पर्यटनका कारण अन्तर्राष्ट्रिय पर्यटकका लागि आकर्षक गन्तव्य मानिन्छ । तर, अन्तर्राष्ट्रिय हवाई सम्पर्क सहज नहुँदा पर्यटक आगमन र पर्यटन व्यवसाय विस्तारमा चुनौती रहँदै आएको छ । पोखराबाट दुबईको सिधा उडानले अन्तर्राष्ट्रिय पर्यटकलाई पोखरासम्म आइपुग्न सहज बनाउनुका साथै पोखरेली यात्रुलाई पनि विश्वका विभिन्न गन्तव्यसम्म पुग्ने थप विकल्प दिएको छ । अब यो सेवाले निरन्तरता पाउने, यात्रुको चाप बढ्ने र भविष्यमा पोखराबाट थप अन्तर्राष्ट्रिय गन्तव्यमा उडान विस्तार हुने अपेक्षा पर्यटन व्यवसायीले गरेका छन् ।
