दीननाथ बराल,
पोखरा १४, साउन,
पोखरा महानगरपालिका वडा नं ५, मालेपाटनको खेलमैदानमा यही साउन १६ गते (शुक्रबार) दोस्रो मालेपाटन खुल्ला लाखेनाच प्रदर्शन तथा सांस्कृतिक कार्यक्रम हुने भएको छ । कार्यक्रममा पोखराका २० वटा लाखेनाच समूहले आकर्षक प्रस्तुति गर्ने तयारी भएको कार्यक्रम संयोजक विनय श्रेष्ठले बताउनु भयो ।
मालेपाटन खेलमैदानमा हुने कार्यक्रममा १५ हजार भन्दा बढी दर्शक भेला गराउने अपेक्षा गरिएको उहाँले दाबी गर्नुभयो । तायाः मचा नाच समिति, मालेपाटनको आयोजनामा नेवाः मिसाः पुचः इकाई ५, मालेपाटन ल्यांहः पूँचः र मालेपाटन नेवा गुठी सहआयोजकका रूपमा रहेका छन्। कार्यक्रम केवल नाच प्रदर्शन मात्र नभई मौलिक नेपाली संस्कृति, परम्परा र समुदायको ऐतिहासिक सम्पदाको संरक्षण र प्रचार गर्ने उद्देश्यले आयोजना गरिएको संयोजक श्रेष्ठले बताउनु भयो । पोखरालाई सांस्कृतिक आन्दोलनका रूपमा अघि बढाउन यस कार्यक्रम महत्त्वपूर्ण हुने उहाँले विश्वास व्यक्त गर्नुभयो ।
शताब्दीयौंदेखि प्रचलित लाखेनाचको संरक्षण र प्रवद्र्धन गर्दै मालेपाटनलाई सांस्कृतिक गन्तव्यका रूपमा स्थापित गर्ने लक्ष्यसहित कार्यक्रम गर्न लागिएको संयोजक श्रेष्ठले बताउनु भयो । युवापुस्तालाई मौलिक कला र परम्परातर्फ आकर्षित गर्न यो कार्यक्रम महत्त्वपूर्ण हुने अर्का संयोजक बसन्त प्रसाद श्रेष्ठले बताउनु भयो । आजका युवाहरू परम्परा र संस्कृतिबाट टाढिँदै गएका कारण यस कार्यक्रम मार्फत उनीहरूलाई आफ्नै जरा, पहिचान र सामुदायिक चेतनासँग पुनः जोड्ने प्रयास गरिएको उहाँले जनाउनु भयो ।
कार्यक्रममार्फत नेतृत्व विकास, स्थानीय उत्पादनको प्रवद्र्धन र नयाँ कलाकारहरूको उत्प्रेरणासमेत गरिने अपेक्षा गरिएको छ। साथै, कार्यक्रममा नेवारी खानाका स्टल, हस्तकला प्रदर्शनी र परम्परागत पोशाकमा सहभागी हुने अवसर समेत उपलब्ध हुनेछ।
