दीननाथ बराल,
पोखरा ११, साउन,
विदेशी मुद्राको अवैध कारोबारमा संलग्न रहेको आरोपमा कास्की प्रहरीले करिब ७५ लाख ९६ हजार रुपैयाँ नगद सहित तीन जनालाई पक्राउ गरेको छ । शनिबार साँझ ५ बजे प्राप्त सूचनाको आधारमा छापा मार्दा उक्त रकम सहित ३ जनालाई पक्राउ गरिएको जिल्ला प्रहरी कार्यालय कास्कीले आइतबार पोखरामा आयोजित पत्रकार भेटघाट कार्यक्रममा जानकारी गराएको हो ।
पोखरा लेकसाइडका दुई वटा मनि एक्सचेन्ज र कास्की तथा रुपन्देहीमा रेष्टुरेण्ट व्यावसाय सचालन गर्दै अवैध रुपमा विदेशी मुद्रा सटही सम्बन्धि कारोवार गरेको आरोपमा हाल ३ जनालाई पक्राउ गरिएको जिल्ला प्रहरी कार्यालय कास्कीका प्रहरी प्रमुख एसपी श्यामबाबु ओलियाले बताउनु भयो ।
पक्राउ पर्नेहरूमा रुपन्देहीको सिद्धार्थनगर नगरपालिका–१३ हाटबजारका ४५ बर्षीय महमुदिन एम अहमद, झापाको दमक नगरपालिका–४ निवासी तथा हाल पोखरा–६, बैदाम बसोबास गर्दै आउनु भएको राजकुमार बुढाथोकी र पोखरा–१९, पुरनचौरका खेमराज पौडेल रहनु भएको छ । अहमदले कास्की र रुपन्देहीमा रेष्टुरेण्ट व्यवसाय संचालन गर्दै आउनु भएको थियो ।
उहाँहरुको साथबाट १९ हजार ६ सय अमेरिकी डलर, ४ हजार युरो तथा ४४ लाख ८ हजार नेपाली रुपैयाँ नगद बरामद गरिएको प्रहरीले जनाएको छ। कुल रकमको नेपाली रूपान्तरण मूल्य करिब ७५ लाख ९६ हजार ९ सय रुपैयाँ बराबर रहेको छ।
एसपी ओलियाका अनुसार झापा दमकका ४५ बर्षका राजकुमार बुढाथोकी विगत २० वर्षदेखि र पोखरा १९ का ४३ बर्षीय खेमराज पौडेल १४ वर्षदेखि मनी एक्सचेन्ज कम्पनी सञ्चालन गर्दै अवैध विदेशी मुद्राको सटही कारोबारमा संलग्न रहनु भएको थियो । पोखराको लेकसाइडमा हिलारी मनी एक्सचेन्ज २० बर्ष देखि र विगत १४ बर्ष देखि सगरमाथा मनी एक्सचेन्ज अवैध रुपमा संचालन हुदै आएको प्रहरीको दाबी छ ।
उहाँहरु माथि राष्ट्र बैंक ऐन, २०५८ को परिच्छेद ११, दफा ९५ अनुसार, बैंकबाट इजाजतपत्र नलिई विदेशी विनिमय कारोबार गरेको कसुरमा कारबाही प्रक्रिया अघि बढाइएको प्रहरीले जनाएको छ । नेपाल राष्ट्र बैङ्क ऐन, २०५८ बमोजिमको कसूरमा ३ जना पक्राउ पर्नु भएको बताइन्छ ।
विदेशी विनिमय कारोवार गरेमा वा त्यस्ता कार्यमा संलग्न भएमा “वा प्रचलित कानून बमोजिम बैंकबाट ईजाजतपत्र लिनु पर्नेमा सो नलिई त्यस्तो कारोवार गरेमा वा परिच्छेद –९ क बमोजिमको फरफारखको प्रक्रियामा बाधा पु¥याएमा यस ऐन बमोजिम कसूर गरेको मानिनेछ भनेर कानूनमा उल्लेख छ ।
