
पोखरा, ११, फागुन,
पोखरा २२ को पुम्दीकोटमा जारी महायज्ञमा श्रद्धालु भक्तजनहरुको भिड बढ्दो रुपमा रहेको छ । महायज्ञमा हरेक दिन जसो श्रद्धालुभक्तजनहरुको सहभागिता बढ्दो रुपमा रहेको पुम्दीकोट कोट विकास समितिका अध्यक्ष एवं महायज्ञका मुल संयोजक चन्द्रकान्त बरालले बताए ।

समृद्धि र विकास, बेरोजगार र विदेश पलायन हुनेहरुका लागि निकास भन्ने मुल नाराका साथ कैलाशधाम निर्माण परिकल्पना गर्दै आयोजना गरिएको ज्ञान महायज्ञमा पोखरा, कास्की सहितका छिमेकी जिल्ला एवं देश तथा विदेशबाट श्रद्धालु भक्तजनहरुको भिड बढ्दो क्रममा रहेको उनले जनाए । आइतबार गण्डकी प्रदेशका निवर्तमान मुख्यमन्त्री खगराज अधिकारीले महायज्ञको अवलोकन एवम् निरीक्षण गरेका थिए । श्रीमद्भागवत ज्ञान महायज्ञ एवं महाशिवरात्री महिमाको पाँचौ दिन पनि श्रद्धालु भक्तजनहरुको उत्साहपुर्ण भिड देखिएको हो। भागवत मञ्जरी राधिका दासीले श्रीमद् भागवत वाचन गर्दै आउदा धेरै भक्तजनहरूको सहभागिता रहेको संयोजक बरालले जानकारी दिए । फागुन ७ गतेदेखि सुरु भएको महायज्ञ १५ गतेसम्म चल्ने समितिका सचिव निर्मलराज बरालले बताए ।

आज मात्रै २० हजार श्रद्धालु भक्तजनहरुले पुम्दिकोटको दर्शन गरेको अध्यक्ष बरालले जानकारी दिए । कार्यक्रममा स्व स्फुर्त रूपमा विभिन्न संघसंस्था एवं आमा समूहहरूले भक्तजनहरूको व्यवस्थापन प्रसाद वितरण लगायत अन्य कार्यहरूमा सहयोग पुर्याउँदै आएका छन् । हरेक साँझ हुने महाआरती कार्यक्रममा भक्तजनहरूको उल्लेख्य भिड लाग्ने गरेको सहसचिव दुर्गाबहादुर गुरुङले बताए । पोखरा देखि पुम्दीकोटसम्म निःशुल्क बस सेवा सञ्चालन भएको समितिका सल्लाहकार मातृका बरालले जानकारी दिए । पोखरा १७ विरौटा, बराल फिड, छोरेपाटन हुँदै पुम्दीकोटसम्म बिहान ९ बजेदेखि यातायात को व्यवस्थापन हुने बरालले जानकारी दिए । पोखरा भ्रमण वर्ष २०२५ को घोषणासँगै पोखरामा आयोजना भएको पहिलो कार्यक्रम रहेको श्रीमद्भागवत ज्ञान महायज्ञमा धार्मिक अनुष्ठानका अलावा श्रीमद्भागवत वाचन तथा विभिन्न कलाकारहरू मार्फत धार्मिक नाटक झाँकी प्रदर्शन लगायत दानदाता सम्मान कार्यक्रम हुँदै आइरहेको छ।

धार्मिक चेतना जागरण गर्दै सनातन परम्परालाई मजबुत बनाउन यसअघि पुम्दीकोटमा वि स २०७३ र ०७९ सालमा ज्ञान महायज्ञ एवम् धार्मिक महोत्सव सम्पन्न भइसकेका छन् । २०७३ सालमा पहिलो पटक ईश्वरकृष्ण महाराजजि, त्यसपछि २०७९ सालमा शिवमहापुराण ज्ञान महायज्ञ आयोजना भयो । जहाँ भागवत भास्कर कमलनयन गौतमले प्रवचन दिएका थिए । समाजमा बिग्रदै गएको मानसिक स्वास्थ्यलाइ आध्यात्मिक जागरण मार्फत हाम्रो मन,चित्त शुद्धीकरण गर्ने र सनातन धर्मको संरक्षण गर्दै आकर्षक धार्मिक पर्यटकीय गन्तव्यका रुपमा पुम्दिकोट बनाउने मुल उद्देश्य सहित महायज्ञको आयोजना गरिएको हो ।

यसैबीच महायज्ञमा दानराशिका आधारमा १ हजार रुपियाँसम्मका दानहरुलाई दान पेटिकामा खसालिने, रु १ हजार देखि ३ हजारसम्म दान गर्ने दाताहरूको नाम अभिलेखमा राखी रसिद प्रदान गरिने, ३ हजार १ रुपियादेखि ५ हजार रुपियासम्म दान गर्ने दाताहरूलाई प्रमाणपत्र द्वारा सम्मान गरिने, ५ हजार १ रुपियाँ देखि १० हजारसम्म दान गर्ने दाताहरूलाई फ्रेमसहितको प्रमाणपत्रद्वारा राम नमीले सम्मान गरिनेछ ।

त्यसैगरी १० हजार १ रुपियाँदेखि रु २५ हजारसम्म दान गर्ने दाताहरूलाई फ्रेमसहितको प्रमाणपत्र तथा उक्त रकम दाताहरुको नाम शिलालेखमा लेखिनेछ। त्यसैगरी २५ हजार १ रुपियादेखि ५० हजारसम्म दान गर्ने दाताहरूलाई माथिका सम्मानसहित भजन किर्तनले स्वागत गर्दै मञ्चबाट नाम घोषणा गरिनेछ। ५० हजार १ रुपियाँदेखि १ लाख सम्म दान गर्ने दाताहरुलाई संस्थाको आजीवन सदस्यता प्रदान गरिनेछ भने १ लाख १ रुपियाँ देखि २ लाख २५ हजार ९९९ सम्म दान गर्ने दाताहरूलाई माथिका सम्मानसहित आकर्षक मायाको चिनो प्रदान गरिनेछ ।

२ लाख २५ हजार रुपियाँदेखि ५ लाखसम्म दान गर्ने दाताहरूलाई माथिका सम्मानसहित परिसरभित्र रहेका कुनै एक शिवलिङ्ग उनको नामबाट स्थापित गरिनेछ। त्यसैगरी ५ लाख रुपियाँदेखि माथि दान गर्ने दाताहरूलाई आयोजक समितिको निर्णयले उचित सम्मान दिने कुरा समितिका व्यवस्थापक रुद्रनाथ पौडेलले जानकारी दिए ।
