दीननाथ बराल,
पोखरा २४, माघ,
चर्च ब्वाइज युनाइटेड पोखरामा जारी २४ औं संस्करणको आहा रारा पोखरा गोल्ड कप फुटवल प्रतियोगिताको क्वार्टरफाइनलमा प्रबेश गरेको छ । पोखरा रंगशालामा आज (बिहिबार) भएको तेश्रो प्रि—क्वाटरफाइनल खेलमा चर्च ब्वइजले एनआरटीलाई सडन डेथमा ६–५ ले पराजित गरी क्वाटरफाइनलमा यात्रा तय गरेको हो ।
९० मिनेटको निर्धारितमा दुवै टोलीबाट १–१ गोल र ३० मिनेटको अतिरिक्त समयमा गोल रहित बराबरीमा टुंगिए पछि टाईब्रेकरमा पनि दुबै तर्फ ४—४ गोल भए पछि खेल अन्तिम विकल्प सडन डेथमा पुगेको थियो । चर्च ब्वाइजका गोलरक्षक टिकेन्द्रसिंह थापाको सडेन डेथमा पेनाल्टी सुटमा गोल गर्दा एनआरटिका माइकल मगरले प्रहार गरेको पेनाल्टी सुटमा गोल गर्न चुक्नुभयो ।
पेनाल्टीमा चर्च ब्वाइजका लागि पेनाल्टी सुटमा नवीन लामा, मिलन राई, अकिन्स बाफोर, अबायोमी फकुन्ले, टिकेन्द्रसिंह थापा र प्रशान्त लक्छमले गोल गर्दा सर्ज डिगा र राज भुसालको प्रहारलाई एनआरटीका गोलरक्षक विशाल सुनारले बचाउनु भयो । सकल रेग्मीको प्रहार भने बाहिरिएको थियो ।
एनआरटीका लागि अञ्जन विष्ट, सुमीत श्रेष्ठ, विशाल सुनार र राजिव लोप्चनले पेनाल्टी सुटमा गोल गर्दा जन्मजय धामी, रिचर्ड विल्सन र माइकल मगरको प्रहारलाई टिकेन्द्रले उत्कृष्ट बचाउँदा एञ्जल महर्जनको प्रहार बाहिरिएको थियो । खेलको २४ औं मिनेटमा रिचर्ड विल्सनको गोलमार्फत एनआरटीले अग्रता लिए पनि खेलको ६३औं मिनेटमा नवीन लामाले पाएको पेनाल्टीको अवसरलाई सदुपयोग गरी गोल गर्दै चर्च ब्वाइजलाई बराबरीमा पुर्याउनु भयो ।
चर्च ब्वाइजले साबिक विजेता त्रिभुवन आर्मी फुटबल क्लबसंग अब सेमिफाइनलमा भिड्ने भएको छ । यसैबिच, भोलि (शुक्रबार) भारतको थन्डरबोल्ट नर्थ यूनाइटेड र संकटा क्लव बिचको अन्तिम प्रि—क्वाटरफाइनल खेल हुने भएको प्रतियोगिताका संयोजक पूर्णबहादुर गुरुङले जनाउनु भयो । प्रतियोगिताको मुख्य प्रायोजक हिमश्री फुड्स प्रालिको उत्पादन रारा तयारी चाउचाउ रहेको छ ।
फागुन ३ गतेसम्म संचालन हुने उक्त प्रतियोगितामा ३ विदेशी सहित १२ टिमको सहभागिता रहेको क्लवका अध्यक्ष केशवराज बरालले बताउनु भयो । ‘आत्मा साक्षी राखी मन, वचन र कर्मले सामाजिक सेवा गरौं’ भन्ने उद्देश्यका साथ २०५५ सालमा स्थापित सहारा क्लब पोखराले फुटबल मार्फत सामाजिक कार्य गर्दै आएको महासचिव रामजी प्रसाद अधिकारीले बताउनु भयो । तष्विरः शुर्दशन रञ्जित
