दीननाथ बराल,
पोखरा २३ मंसिर,
सशस्त्र प्रहरी बल (एपिएफ) गण्डकी मुख्यालयको टोली २५ औं संस्करणको आर्दश कप फुटवल प्रतियोगिता २०८१ को सेमिफाइनलमा प्रबेश गरेको छ । पोखराको सैनिकबस्ती भण्डारढिक खेल मैदानमा आइतबार भएको खेलमा एपिएफले अर्को विभागिय टोली नेपाल आर्मीको सिद्धिदल गण पश्चिम पृतना हेड क्वाटरलाई ३–१ को गोल अन्तरले पराजित गर्दै सेमिफाइनलमा यात्रा बनाएको हो ।
एपिएफको जितमा नवराज मगर, रन्जित चौधरी प्रविन स्याङताङले एक÷एक गोलको योगदान दिदा आर्मीका मदन लिम्बुले ईन्जुरी समयमा शान्त्वना एक गोल गर्नु भएको थियो । खेलको २१ मिनेटमा मगरले, ६५ मिनेटमा चौधरीले र ७० औं मिनेटमा स्याङताङले गोल गर्नु भएको थियो । यस अघि उक्त खेलको शुभारम्भ भने गण्डकी प्रदेशका निवर्तमान सांसद दीपक कोइराला (रुपक) ले रेफ्रि कविमान गुरुङलाई बल हस्तान्तरण गरी गर्नु भएको थियो ।
भोलि (सोमबार) कास्की ११ र एन्फा स्याङ्जा (होराइजन) बीच खेल दिउँसो १ः०० बजे पछि हुने भएको आर्दश युवा क्लवका सचिव सन्तोष गुरुङले पोखराक्लिकलाई बताउनु भयो । शनिबार देखि २५ औं सस्करणको आदर्श कप फुटवल प्रतियोगिता २०८१ सुरु भएको हो । शनिबारको उद्घाटन खेलमा आयोजकः आर्दश युवा क्लवले एन्फा तनहुँलाई १–० ले पराजित गरी सेमिफाइनलमा यात्रा बनाएको छ ।
