पोखरा २५, कार्तिक,
राष्ट्रिय स्वतन्त्र पार्टीका सभापति एवं पूर्वउपप्रधान तथा गृहमन्त्री रवि लामिछानेलाई कास्की जिल्ला अदालतले पुनः १३ दिन थुनामा राख्न प्रहरीलाई अनुमति दिएको छ । सहकारी ठगी प्रकरणमा कार्तिक २ गते पक्राउ पर्नु भएको सभापति लामिछानेलाई कास्की जिल्ला अदालतले चौथो पटक थप १३ दिन थुनामा राख्न प्रहरीलाई अनुमति दिएको हो ।
जिल्ला अदालत कास्कीका न्यायाधीश नवराज दाहालको इजलासले रवि माथि थप १३ दिन थुनामा राखेर अनुसन्धान गर्न आदेश दिएको जिल्ला अदालत कास्कीका सूचना अधिकारी सुरज अधिकारीले बताउनु भयो । पहिलो पटक ६ दिन म्याद दिएकोे अदालतले दोस्रो पटक ७ दिन र तेस्रो पटक १० दिनको म्याद दिएको थियो । लामिछाने माथि सहकारी ठगीसँगै संगठित अपराध र सम्पत्ति शुद्धीकरणमा समेत अनुसन्धान भइरहेको प्रहरीले जनाएको छ ।
लामिछाने विरुद्ध रुपन्देहीमा पनि पक्राउ पुर्जी जारी भएको छ । उहाँलाई अब रुपन्देही लैजाने बताइन्छ । पोखराको सूर्यदर्शन सहकारीको रकम गोर्खा मिडियाबाट अपचलन गरेको भन्दै पूर्वप्रबन्ध निर्देशक रवि सहित पूर्वउपाध्यक्ष समेत रहनु भएको पूर्वडीआईजी छविलाल जोशीलाई समेत अदालतमा उपस्थित गराइएको छ ।
यसैबिच, रास्वपाले आइतबार पार्टी कार्यालय किरोकिलोमिटर देखि बिरोध प्रर्दशन गर्दै पोखराको चिप्लेढुंगासम्म पुगेको थियो । आफ्ना सभापतिलाई राजनीतिक प्रतिशोधका आधारमा पक्राउ गरेर म्याद थप गर्दै हिरासदमा राखेको रास्वपाको आरोप छ । पोखराको सुरक्षा व्यबस्था कडा पारिएको थियो ।
