दीननाथ बराल
पोखरा २९, जेठ,
गण्डकी प्रदेशको मन्त्रिपरिषद विस्तार गरिएको छ । विश्वासको मत प्राप्त गरेको भोलि पल्ट आज (मंगलबार) मुख्यमन्त्री सुरेन्द्रराज पाण्डेले दुई मन्त्रीलाई नियुक्त गरेसंगै मन्त्रिपरिषद विस्तार भएको हो ।
नवनियुक्त मन्त्रीद्वय फणिन्द्र देवकोटा र राजीव गुरुङ (दीपक मनाङे)ले मंगलबार नै पद तथा गोपनीयताको शपथ ग्रहण गर्नु भएको छ । गण्डकी प्रदेश प्रमुख डिल्ली राज भट्टले मुख्यमन्त्री सुरेन्द्रराज पाण्डेकोे सिफारिसमा राजिव गुरुङज्यूलाई भौतिक ,पुर्वाधार तथा यातायात मन्त्री र फणीन्द्र देवकोटाज्यूलाई उर्जा जलश्रोत तथा खानेपानी मन्त्रीको सपथ खुवाउनु भएको हो ।
देवकोटाले ऊर्जा, जलस्रोत तथा खानेपानी मन्त्रालय र मनाङेले पुनः भौतिक पूर्वाधार तथा यातायात मन्त्रालयको जिम्मेवारी प्राप्त गर्नु भएको हो ।
माओवादी चुनाव चिह्नबाट विजयी नेपाल समाजवादी पार्टीका सांसद फणिन्द्र देवकोटाले ह्वीप जारी भए पनि सुरेन्द्रराजलाई सोमबार फ्लोर क्रस गरी विश्वासको मत दिनु भएको थियो ।
फणिन्द्र अहिले माओवादी कोटाबाटै संसदको सामाजिक विकास समिति सभापति हुनु हुन्छ । माओवादी चुनाव चिह्नबाट चुनाव लडेर जित्नु भएको उहाँले पाण्डे नेतृत्वलाई फ्लोर क्रस गरेर विश्वासको मत दिएकोले पहिलो पटक मन्त्री बन्नु भएको हो ।
मनाङे गण्डकीमा छैटौं पठक मन्त्री हुनु भएको हो । यस अघि उहाँ दुई पटक भौतिक र ३ पटक खेलकुद मन्त्री हुनु भएको छ ।
सर्वोच्च अदालतले ठूलो दलको नेताको हैसियतमा मुख्यमन्त्री नियुक्त गर्न आदेश दिएपछि नेपाली कांग्रेसका नेता पाण्डे जेठ १६ गते मुख्यमन्त्री नियुक्त हुनु भएको थियो । यस अघि नेकपा एमाले संसदीय दलका नेता खगराज अधिकारी मुख्यमन्त्री हुनु भएको थियो । अधिकारीले सभामुख सहितको ३१ मतमा विश्वासको मत लिए पछि मुख्यमन्त्री नियुक्त भए पछि सर्वोच्चले उक्त निर्णय बदर गरिदिएको थियो ।
