पोखरा २६, जेठ,
पोखरामा जारी गण्डकी प्रदेश स्तरीय पुरुष फुटबल प्रतियोगिता अन्तर्गत भोलि (आइतबार) सेमीफाइनलका खेलहरु हुने भएका छन्। प्रदेश खेलकुद परिषद गण्डकीको र गण्डकी प्रदेश फुटबल संघको आयोजनमा पोखरा रंगशालामा जारी प्रतियोगिता अन्तर्गत शनिबारको क्वाटरफाइनलका खेलहरु सम्पन्न भएसंगै आइतबार दुई वटा सेमिफाइनलका खेलहरु हुने भएको संघ गण्डकीका महासचिव बिनोद गुरुङले बताउनु भयो ।
पहिलो सेमीफाइनलमा कास्कीले म्याग्दीसंग सामना गर्नेछ भने दोश्रो खेलमा बागलुङले तनहुँसंग प्रतिष्प्रर्धा गर्ने भएको छ । शनिबार भएको पहिलो क्वाटरफाइनलमा म्याग्दीले स्याङजालाई टाइव्रेकरमा ४–३ ले स्तव्ध बनायो । निर्धारित समयमा दुबै टिमले २–२ गोलले बराबरीमा सके पछि खेल टाइब्रेकरमा धकेलिएको थियो । स्याङजाका क्षितिज जिटी र राजेन्द्र श्रेष्ठको प्रहार बाहिरिए पछि म्याग्दीको जित सहज बनेको थियो । यता म्याग्दीका रिजन पुनको समेत प्रहार बाहिरिएको थियो ।
निर्धारित समयमा बलियो मानिएको स्याङजालाई म्याग्दीले आक्रमक खेल खेल्दै ३२ मिनेटमा सुमन पुनले अग्रता दिलाउनु भयो भने ठिक तीन मिनेट पछि मनिष श्रेष्ठले टिमका लागि अर्को गोल थप्नु भयो । पहिलो हाप पछि स्याङजा खेलमा फर्कियो । स्याङजाका लागि सोम गुरुङ र अनिश गुरुङले गोल गर्दै खेल बराबरीमा ल्याउनु भएको थियो ।
यता कास्कीले आफ्नो होम ग्राउण्डको फाइदा उठाउँदै नवलपुर विरुद्धको खेल ४–० को जित निकाल्यो । खेलको ३३ औं मिनेटमा विक्रम गौतमले नवलपुर विरुद्ध गोल गर्दै कास्कीलाई अग्रता दिलाउनु भयो भने अभिषेक थापाले खेलको दोस्रो हाफमा व्यक्तिगत दुई गोल गर्नु भयो । उहाँले ४५ औं र ४८ औं मिनेटमा गोल गरे भने ५४ औं मिनेटमा कास्कीका लागि चौथो गोल किशन गुरुङले गर्नु भयो ।
आयूष खड्काको ह्याट्रिकमा पर्वत विरुद्ध बागलुङले ४–० सहज जित निकालेको छ । आयूषले खेलको ४२, ४९ र ७८ औं मिनेटमा गोल गर्नु भएको होे । त्यस्तै निश्चल महतले ७१ औं मिनेटमा चौथो गोल थपे पछि बागलुङले एकतर्फी ४ गोल अन्तरले जित हात पारेको हो ।
शनिबार नै सम्पन्न भएको अन्तिम क्वाटरफाइनलमा तनहुँले लमजुङ विरुद्धको खेलमा ५–० को गोल अन्तरले जितेको छ । गोरखा विरुद्ध पहिलो खेल जितेको तनहुँले क्वाटरफाइनलमा लमजुङलाई पराजित गरेको हो । तनहुँका सन्त बहादुर गुरुङको ह्याट्रिक मद्धतले तनहुँले जित हात पार्न सफ भयो । उहाँले खेलको १८, ५६, ६५ र ७८ मिनेटमा गोल गरी ४ गोल गर्दा सौगात गुरुङले खेलको ३३ औं मिनेटमा एक गोल गर्नु भएको थियो ।
प्रतियोगितामा उपाधि बिजेता टिमले नगद २ लाख र उपविजेता हुने टिमले नगद १ लाखका साथमा ट्रफी र मेडल प्राप्त गर्नेछन् । प्रतियोगिताबाट दशौं राष्ट्रिय खेलकुद प्रतियोगिताका लागि खेलाडी छनौट हुने भएको छ ।
