पोखरा, २४ मंसिर
विश्वकर्मा समाज (पर्वत, स्याङ्जा, कास्की) को बैठक चन्द्र किशोर गौतमको अध्यक्षता एवम् नेपाल सुनचाँदी व्यवसायी संघका उपाध्यक्ष दुर्गा बहादुर सुनारको प्रमुख आतिथ्यतामा सम्पन्न भयो ।
कार्यक्रममा २०८० सालको तिहारको अवसरमा संचालन गरिएको देउसीभैलो कार्यक्रमबाट संकलन भएको रकमको सार्वजनिक कोषाध्यक्ष धनबहादुर सुनारले गर्नुभएको थियो । उक्त देउसी भैलो कार्यक्रमबाट रु.३ लाख १ हजार ९ सय ८ र आजीवन सदस्यताबाट रु.६० हजार गरी रु(३ लाख ६१ हजार ९ सय ८ रुपैयाँ आम्दानी भएको थियो । यसै आम्दानीबाट जाजरकोटमा भएको विनासकारी भुकम्प पीडितलाई राहत स्वरुप रु.२५ हजार छुट्याइएको कोषाध्यक्षले जानकारी गराउनु भयो ।
कार्यक्रममा प्रमुख अतिथि दुर्गा बहादुर सुनारले यो देशको परिवर्तनमा विश्वकर्माहरुको ठूलो योगदान भएको बताउँदै २००७ साल, ०४६ साल र ०६२।०६३ मा यस समुदायका मानिसहरुले पनि आहुति दिएको, फलस्वरुप नयाँ संविधान भएको छ तर दलित बर्गको लागि संविधान कार्यान्वयन नभएको बताउनुभयो । उहाँले रुकुम हत्याकाण्डमा म कास्कीको प्रमुख रहेर आन्दोलन गरिएको तर आज नवराज विकका हत्याराहरु जेल चलान भएका छन् यसले न्याय अझै रहेछ भन्ने प्रमाण दिएको बताउनुभयो । यस्ताखाले समस्यामा यो समाज सदैव लागि रहनेछ भन्ने विश्वास लिएको बताउनुभयो ।
शुभकामना मन्तव्यको क्रममा सल्लाहकार एवम् महाशिला गाउँपालिका वडा नं. ६ का वडा अध्यक्ष रामबहादुर सुनारले यस समाजले अहिलेसम्म गरेका कार्यहरु एकदम सही भएको तर दिन दुखी विश्वकर्माहरुकोमा पुगेर उनीहरुका समेत हक अधिकार र पीडामा साथ दिन अनुरोध गर्नुभयो । विश्वकर्मा कल्याण समाजका उपाध्यक्ष राजकुमार घिमिरेले समाज स्थापनाको छोटो समयमा महिलाहरुको संगठन बनाई अगाडि बढाएको र महिला उत्कृष्ट भेषभूषमा पुरस्कृत भएकोमा खुसी लागेको बताउँदै युवाहरुलाई र नवप्रतिभाहरुलाई प्रोत्साहन गर्ने जसता कार्यले उच्च स्थान बनाएको बताउनुभयो ।
विश्वकर्मा सेवा समाजका महासचिव तारा गौतामले समाजका सबै गतिविधिमा अगाडि रहेको र स्याङ्जाली सम्पर्क समाज लगायत अन्य संस्थाहरुमा सहकार्य गर्दै अगाड बढेको अवस्थामा अझ दिदी बहिनीहरुलाई सीपमूलक, आयमूलक तालिम दिन आवश्यक रहेको बताउनुभयो । उहाँले त्यसको लागि आफूले सक्दो सहयोग गर्न तत्पर रहेको बताउनुभयो ।
महिला समितिका सचिव गीता गौतमले समाजले आयोजना गरेका हरेक कार्यक्रममा महिला समितिको अहम भूमिका रहेको बताउँदै महिलालाई विभिन्न प्रकरका तालिम दिई अगाडि बढ्नुपर्ने आवश्यकता औंल्याउनुभयो ।
कार्यक्रमक सभाध्यक्ष किशोर गौतमले समाज स्थापनाको छोटो अवधिमा विभिन्न कार्यक्रमहरु गर्दै समस्त विश्वकर्माहरुको मन जित्न सफल भएकोले अब यस समुदायको विकास र उन्नतिमा तिनै तहका सरकारसँग मिलेर कार्य गर्ने र विश्वकर्मा समुदायको समस्यामा ठाउँको ठाउँ उपस्थित भई समस्या समाधानमा अग्रसर रहने बताउनुभयो । उहाँले अन्य उपसमितिहरु गठन गर्ने, स्वास्थ्य, शिक्षा, रोजगार, सीप सिर्जनामा अगाडि बढाउने र सदस्यहरुलाई राहत प्याकेजमा सहयोग गर्ने बताउँदै तिहारको अवसरमा सहभागी हुने र सहयोग गर्नेप्रति कृतज्ञ रहेको बताउनुभयो ।
समाजका सचिव खड्कबहादुर सुनारले संचालन गर्नुभएको कार्यक्रममा उपाध्यक्ष श्याम बहादुर रसाइलीले देउसी भैलोमा अहोरात्र खटेर कार्य गर्ने सबैलाई धन्यवाद दिनुभएको थियो ।
