पोखरा २०, कार्तिक
कलिन स्मिथ अर्थात् ‘पुतली बाजे’ अब हाम्रो स्मरणमा मात्र रहेका छन्। उनको ८८ बर्षको उमेरमा उपचारका क्रममा हरियो खर्क अस्पतालमा भौतिक रुपमा उनले सबैलाई छाडेकाछन् ।
सन् १९३६ मा जन्मिएका कलिन ३० वर्षको युवा उमेरमा सन् १९६६ मा युनाइटेड मिसनमार्फत शिक्षण पेसाका लागि नेपाल आएका थिए ।
सानैदेखि हिसाब र विज्ञानमा तीक्ष्ण क्षमता भएका कलिन आफ्नै मामाको पुतली सङ्कलन गर्ने सोखबाट प्रभावित हुँदै नेपालमा पुतलीको अध्ययनमा लागेका व्यक्ति हुन् । नेपालका डाँडाकाँडा, भीर पाखा र पखेरा पुगेर पाँच सयभन्दा बढी प्रजातिका पुतली सङ्कलन गरी पृथ्वीनारायण क्याम्पस परिसरमा पुतली सङ्ग्रहालयको स्थापना गरेका छन् । पुतलीको माध्यमबाट नेपाललाई विश्वसामु चिनाउन उनले अतुलनीय योगदान गरेका छन् ।
कलिन स्मिथको योगदानको कदर गर्दै नेपाल सरकारले २ डिसेम्बर २०१९ मा उनलाई सम्मानित नागरिकको दर्जा दिँदै सम्मानार्थ नागरिकता समेत प्रदान गरेको छ । उनी विगत लामो समयदेखि पोखरा १८ लामागाउँमा बस्दै आएका थिए ।
स्व।कलिनको अन्तिम बिदाइ तथा श्रद्धाञ्जलीका लागि उहाँको पार्थिव शरीर सोमबार पृथ्वीनारायण क्याम्पस परिसरमा रहेको बटरफ्लाई म्युजियमको प्राङ्गणमा राखिएको थियो । त्यसपछि क्रिश्चियन परम्परा अनुसार उनको अन्तिम संस्कार भएको छ । 
उनको निधनले आफू निकै दुखी भएको भन्दै पोखरा महानगरपालिकाका प्रमुख धनराज आचार्यले श्रद्धाञ्जली सहित गहिरो समवेदना प्रकट गर्नुभएको छ ।
कलीन स्मिथ ुपुतली बाजेु को पार्थिव शरीर अन्तिम श्रद्धाञ्जली अर्पण गर्दै पोखरा महानगरपालिकाका प्रमुख धनराज आचार्य सहितको टिम ।
