दीननाथ बराल,
पोखरा, साउन २०,
नेपालका लागि इजरायलका राजदूत श्मुलिक एरी बासले इजरायलमा नेपाली श्रमिकका लागि थप रोजगारीका अवसर विस्तार गर्न पहल गरिने बताउनुभएको छ । गण्डकी प्रदेशका मुख्यमन्त्री सुरेन्द्रराज पाण्डेसँग आज मुख्यमन्त्री तथा मन्त्रिपरिषद्को कार्यालयमा भएको शिष्टाचार भेटका क्रममा राजदूत बासले नेपाली श्रमिकको सीप, दक्षता र श्रमको कदर गर्दै भविष्यमा थप रोजगारीका अवसर सिर्जना गर्न इजरायल सकारात्मक रहेको धारणा राख्नुभएको हो ।
भेटमा नेपाल–इजरायलबीचको द्विपक्षीय सम्बन्धलाई अझ सुदृढ बनाउने विषयमा विचार आदानप्रदान भएको मुख्यमन्त्री कार्यालयले जनाएको छ । साथै कृषि, स्वास्थ्य, शिक्षा, प्रविधि तथा सीप विकासका क्षेत्रमा इजरायलले नेपाललाई उपलब्ध गराउँदै आएको सहयोगलाई थप प्रभावकारी बनाउने विषयमा पनि छलफल भएको श्रोतको भनाई रहेको छ । मुख्यमन्त्री पाण्डेले गण्डकी प्रदेशलाई कृषिमा आत्मनिर्भर बनाउने अभियानलाई सफल बनाउन इजरायलको कृषि प्रविधि, आधुनिकीकरण तथा नवीन कृषि प्रणाली भित्राउन सहयोग गर्न आग्रह गर्नुभयो । उहाँले इजरायलको आधुनिक कृषि प्रविधि र अनुभवबाट प्रदेशका किसान प्रत्यक्ष लाभान्वित हुने विश्वास व्यक्त गर्नुभयो ।
भेटवार्ताका क्रममा इजरायलमा कार्यरत नेपाली श्रमिकको वर्तमान अवस्था, उनीहरूको हित संरक्षण, सुरक्षित, मर्यादित र व्यवस्थित वैदेशिक रोजगारीका अवसर विस्तारका विषयमा समेत विस्तृत छलफल भएको थियो । संघीय सरकारसँगको सहकार्यका अतिरिक्त प्रदेश सरकारसँग पनि श्रम, सीप विकास तथा जनशक्ति व्यवस्थापनका क्षेत्रमा आपसी सहकार्य र समझदारी बढाउने सम्भावनाबारे सकारात्मक विचार आदानप्रदान भएको जनाइएको छ । त्यसैगरी, पोखरा अन्तर्राष्ट्रिय विमानस्थलबाट अन्तर्राष्ट्रिय उडान विस्तार गर्ने प्रदेश सरकारको नीतिअनुरूप इजरायलसँग पर्यटन प्रवद्र्धन, आवागमन सहज बनाउने तथा हवाई सम्पर्क विस्तारका सम्भावित अवसरहरूबारे पनि सकारात्मक छलफल भएको थियो ।
