काठमाडौं,
राष्ट्रिय परीक्षा बोर्डले यस वर्षको माध्यमिक शिक्षा परीक्षा (एसईई) को नतिजा परीक्षा सकिएको करिब एक महिनामै सार्वजनिक गरेको छ । यसपटकको नतिजामा गत वर्षको तुलनामा उल्लेखनीय सुधार देखिएको छ । बोर्डका अनुसार कुल परीक्षार्थीमध्ये ६५.९८ प्रतिशत विद्यार्थी ग्रेडेड भएका छन् ।
गत वर्ष एसईईमा ६१.८१ प्रतिशत विद्यार्थी मात्र ग्रेडेड भएका थिए । यस वर्ष उक्त संख्या बढेर ६५.९८ प्रतिशत पुगेपछि नतिजामा सुधार आएको शिक्षा सचिव चुडामणि पौडेलले बताएका छन् । यस वर्ष कुल २ लाख ८४ हजार १६० विद्यार्थी ग्रेडेड भएका छन् । गत वर्ष भने २ लाख ७१ हजार २ सय ९९ विद्यार्थी मात्रै ग्रेडेड भएका थिए । यस्तै, यसपटक नन–ग्रेडेड हुने विद्यार्थी संख्या घटेको छ । बोर्डका अनुसार १ लाख ४६ हजार ५०७ विद्यार्थी नन–ग्रेडेड भएका छन् । गत वर्ष यो संख्या १ लाख ६७ हजार ५९७ रहेको थियो ।
नतिजा विश्लेषण अनुसार यस वर्ष सबैभन्दा धेरै विद्यार्थीले २.८० देखि ३.६० जीपीए प्राप्त गरेका छन् । उक्त समूहमा ९४ हजार २ सय २२ विद्यार्थी रहेका छन् । त्यस्तै, ३.६० देखि ४.०० जीपीए ल्याउने विद्यार्थी संख्या ४८ हजार ३ सय ९२ पुगेको छ ।
यस वर्षको नतिजा समयमै सार्वजनिक हुनु तथा समग्र उपलब्धिमा सुधार देखिनु शिक्षा क्षेत्रका लागि सकारात्मक संकेतका रूपमा हेरिएको छ । बोर्डले विद्यार्थीले अनलाइन तथा एसएमएसमार्फत आफ्नो नतिजा हेर्न सक्ने जनाएको छ ।
