राजकाजी गुरुङ ‘करण’ले प्रतिनिधिसभा निर्वाचनका लागि करिब ११ लाख ९० हजार रुपैयाँ खर्च गरेको विवरण सार्वजनिक गर्नुभएको छ। उहाँले उक्त खर्च विवरण निर्वाचन आयोगमा बुझाउनुभएको श्रोतले जनाएको छ ।
नेपाल कम्युनिष्ट पार्टी (नेकपा) का केन्द्रीय सदस्य समेत रहनुभएका गुरुङ कास्की क्षेत्र नं. १ बाट उम्मेदवार बन्नुभएको थियो। उहाँले चुनावी अभियानका विभिन्न शीर्षकमा खर्च गर्नुभएको छ। उहाँको विवरण अनुसार मनोनयन दर्तामा १० हजार, प्रचार सामग्रीमा १ लाख ५० हजार, सवारीसाधन भाडामा ३ लाख ५० हजार, घरदैलो कार्यक्रममा ३ लाख रुपैयाँ खर्च भएको विवरण निर्वाचन आयोगमा पेश गर्नु भएको हो। त्यस्तै, सम्पर्क कार्यालय भाडामा ४५ हजार, कर्मचारीमा २० हजार, डिजिटल प्रचारमा १ लाख, साउण्ड सिस्टममा ५० हजार, खाना तथा खाजामा १ लाख ५० हजार र चुनावी गीत निर्माणमा १५ हजार रुपैयाँ खर्च भएको उल्लेख गरिएको छ।
गत फागुन २१ गते सम्पन्न प्रतिनिधिसभा निर्वाचनमा गुरुङले २ हजार ४७९ मत प्राप्त गर्नुभएको थियो। सोही क्षेत्रमा भने रास्वपाका गनेस पौडेल विजयी हुनुभएको थियो । एमालेका बैनबहादुर अधिकारी र काँगे्रसबाट तिलक रानाभाटले उम्मेदवारी दिनु भएको थियो । पौडेलले ३९ हजार ८८३ मत ल्याउदा निकटतम प्रतिद्वन्द्वी नेपाली कांग्रेसका रानाभाटले ११ हजार २१४ मत प्राप्त गर्दा एमालेका उम्मेदवार अधिकारीले १० हजार ४२९ मत ल्याउनु भएको थियो । राप्रपाका बाबुराम थापाले ९७८ मत ल्याउनु भएको थियो ।
