दीननाथ बराल,
पोखरा २८, कार्तिक,
गण्डकी प्रदेश प्रधानमन्त्री कप महिला टी–२० छनोट क्रिकेट प्रतियोगिता २०८३ को उद्घाटन खेलमा घरेलु टिम कास्की जिल्ला महिला क्रिकेट टोलीले विजयी सुरुवात गरेको छ । पोखरा रंगशालाको क्रिकेट मैदानमा आज(शनिबार) सम्पन्न उद्घाटन खेलमा घरेलु टीम कास्कीले नवलपुरलाई १९ रनले पराजित गर्दै विजयी सुरुवात गरेको हो ।
टस जितेर नवलपुरकी कप्तान श्रेया शर्माले पहिले फिल्डिङ गर्ने निर्णय गरेपछि ब्याटिङमा उत्रिएको कास्कीले निर्धारित २० ओभरमा २ विकेट गुमाउँदै ११६ रनको योगफल तयार पारेको थियो । कास्कीका लागि चन्द्रमाया बरालले उत्कृष्ट ब्याटिङ गर्दै ५२ बलमा ४ चौकाको मद्दतले अविजित ५५ रनको अर्धशतकीय पारी खेल्नु भयो । त्यस्तै सम्झना बिकले १८ रन र रिया तामाङले अविजित १४ रनको योगदान दिनुभयो । नवलपुरका तर्फबाट श्रेया शर्मा र अनुषा तिमिल्सिनाले समान एक–एक विकेट लिनु भयो ।
११७ रनको लक्ष्य पछ्याएको नवलपुरले निर्धारित २० ओभरमा ७ विकेट गुमाउँदै ९७ रनमै सिमित भयो । नवलपुरका लागि धनकुमारी क्षेत्रीले ५२ बलमा २८ रन बनाउँदा आयुष्मा चापागाईंले २३ बलमा एक चौका र एक छक्कासहित अविजित २३ रनको योगदान दिनुभयो । निकिता कुँवरले १४ रन बनाउनु भयो । कास्कीको जितमा चन्द्रमाया बरालले बलिङतर्फ पनि उत्कृष्ट प्रदर्शन गर्दै ४ ओभरमा मात्र १२ रन खर्चेर महत्वपूर्ण २ विकेट लिन सफल हुनुभयो । त्यस्तै वर्षा पौडेलले एक विकेट हात लिनुभयो ।
ब्याटिङमा अर्धशतक र बलिङमा दुई विकेटसहित अलराउण्ड प्रदर्शन गरेकी चन्द्रमाया बराल खेलको प्लेयर अफ द म्याच घोषित हुनु भयो । उहाँलाई गण्डकी प्रादेशिक क्रिकेट सङ्घका अध्यक्ष सञ्जयकान्त सिग्देलले ट्रफी प्रदान गर्नुभयो । यसअघि प्रतियोगिताको उद्घाटन गण्डकी प्रदेश खेलकुद परिषद्का जिमित्त सदस्यसचिव दीपेन्द्र परियारले गर्नुभएको थियो । अध्यक्ष सिग्देलको अध्यक्षतामा उद्घाटन सत्र सम्पन्न भएको कोषाध्यक्ष दिवाकर थापाले बताउनु भयो ।
प्रतियोगिताबाट छनोट भएका खेलाडीले आगामी दशौँ राष्ट्रिय खेलकुद प्रतियोगितामा गण्डकी प्रदेशको प्रतिनिधित्व गर्ने अवसर पाउनेछन् । साथै प्रतियोगितामा खेलाडीले गरेको प्रदर्शनका आधारमा पोखरामा मङ्सिरको तेस्रो सातादेखि आयोजना हुने प्रधानमन्त्री कप महिला राष्ट्रिय क्रिकेट प्रतियोगिताका लागि गण्डकी प्रदेशको टोलीसमेत छनौट हुने भएको छ । प्रतियोगितामा गण्डकी प्रदेशका कास्की सहित स्याङजा, पर्वत, नवलपुर, बागलुङ गरी पाँच जिल्ला को सहभागी छ । प्रतियोगिताको मुख्य उद्देश्य उत्कृष्ट खेलाडी छनोट गरी राष्ट्रिय प्रतियोगिताका लागि प्रतिस्पर्धात्मक टोली निर्माण गर्नु रहेको आयोजक सङ्घले जनाएको छ ।
