पोखरा, १९ चैत,
नेपाली नयाँ बर्ष २०८३ को अवसरमा यस बर्ष पनि यही चैत २९ गतेदेखि संचालन हुने २१ औं फेवा नव बर्ष महोत्सवको तयारी अन्तिम चरणमा पुगेको छ । ३ दिने उत्तः महोत्सवमा तीन लाख आन्तरिक तथा बाह्य पर्यटक भित्राउने लक्ष्य सहित तयारी अन्तिम चरणमा पुगेको होटल संघ पोखरा नेपालले आज(विहिबार) पोखरामा आयोजित पत्रकार सम्मेलनमा जानकारी गराएको हो ।
वैशाख १ गतेसम्म संघले लेकसाइडको सडकमा यो महोत्सव आयोजना गर्दै छ । महोत्सवका अवसरमा होटलको अकुपेन्सी दर ९० प्रतिशतसम्म पुग्ने विश्वास गरिएको संघका अध्यक्ष लक्ष्मण सुवेदीले बताए । पोखराको खहरेचोकदेखि सहिदचोक बिचको सडकमा महोत्सव संचालन हुने उनले जनाए । पर्यटन, संस्कृति र खानालाई जोड दिएर यो महोत्सव हुन लागेको हो । महोत्सवमा निःशुल्क प्रवेशको व्यवस्था रहने छ । महोत्सवका अवसरमा संघ अन्तर्गतका सदस्य होटलले आफ्नो प्रकाशित दररेटमा २५ प्रतिशतसम्म छुट प्रदान गर्ने घोषणा गरिसकेका छन् । इ–सेवाबाट होटल बुक गर्दा १० प्रतिशत सम्म क्यासब्याक हुने अफर पनि इ–सेवाले अगाडि सारेको छ ।
प्रदेशस्तरीय मौलिक तथा रैथाने परम्परागत खानाको प्रदर्शनी, पंचैबाजा प्रतियोगिता र पर्यटक दौड प्रतियोगिता महोत्सवका प्रमुख आकर्षण हुन् । सांस्कृतिक, मनोरञ्जनात्मक, लोकदोहोरी र पप कन्सर्टका कार्यक्रम पनि हुने छन् । महोत्सवका अवसरमा स्थानीय खहरेबाट निकालिने झाँकी अम्बोटमा पुगेपछि औपचारिक उद्घाटन समारोह सुरु हुने छ । महोत्सवलाई भव्य बनाउन विभिन्न उपसमितिबाट काम जारी छन् । केही दिन अघि पूर्वी नेपालका विभिन्न शहरमा पुगी नेपाल पर्यटन बोर्ड गण्डकीसँगको समन्वयमा जाउँ है पोखरा कार्यक्रम अन्तर्गत संघले फेवा महोत्सवको निम्ता बाँडिसकेको छ । लुम्बिनी प्रदेशका संचारकर्मीमार्फत् पश्चिमका बासिन्दालाई पनि महोत्सवका सहभागिताका लागि आमन्त्रण पनि संघले गरेको छ । यही चैत २८ गते पोखरामा हुने रात्री दौडका आयोजक पोखरा क्लिक र पोखरा प्रबद्र्धन केन्द्रसँग सहकार्य गर्दै संघले महोत्सव प्रचारको कार्यक्रम पनि अगाडि बढाएको छ ।
फेवा महोत्सवको मुख्य प्रायोजकमा गोर्खा ब्रुअरी प्रालि, सहप्रायोजकमा म्याक्स टाइगर र एक्ट्रिम इनर्जी ड्रिंक तथा प्रायोजकहरुमा अन्नपूर्ण केवलकार लि, इ–सेवा, युनाइटेड वाइनरी प्रालि रहेका छन् । इन्योरेन्स पार्टनरमा सलिको इन्स्योरेन्स रहेको छ । महोत्सव प्रबद्र्धकमा नेपाल पर्यटन बोर्ड गण्डकी प्रदेश, पोखरा महानगरपालिका र उद्योग तथा पर्यटन मन्त्रालय गण्डकी प्रदेश रहेका छन् । नेपाल पर्यटन बोर्ड गण्डकीका प्रमुख मणिराज लामिछानेले उक्त महोत्सवको पूर्व अवसरमा नेपालको पुर्वि क्षेत्र जानुले यहाँको थप पर्यटन प्रबद्र्धन भएको बताए । संघका निवर्तमान अध्यक्ष विकल तुलाचनले पोखरामा रात्रिकालिन सडक दौड नौलो अनुभव भएकोले यसले खेल पर्यटनको प्रबद्र्धन गर्ने जनाए । महोत्सवले खाना र संस्कृतिको समेत प्रमोशन गर्ने सचिव पार्वता पाण्डेले बताइन् ।
