पोखरा, असोज ३०,
नेपालले शानदार प्रदर्शन गर्दै टी–२० विश्वकप एसिया तथा इष्ट एसिया प्यासिफिक ९भ्ब्ए० छनोटको सुपर सिक्स चरणमा ओमानलाई ३८ रनले पराजित गरेको छ । यस जितसँगै नेपालले आगामी वर्ष भारत र श्रीलङ्कामा हुने आइसीसी टी–२० विश्वकप २०२६ का लागि आफ्नो स्थान सुनिश्चित गरेको छ ।
ओमानको अल अमिरातस्थित क्रिकेट एकेडेमी टर्फ–१ मैदानमा आज सम्पन्न खेलमा टस जितेर पहिला ब्याटिङ गरेको नेपालले २० ओभरमा ९ विकेट गुमाउँदै १५१ रनको प्रतिस्पर्धी योगफल बनाएको थियो । नेपालका ओपनर कुशल भुर्तेलले ५१ बलमा ७ चौका र १ छक्कासहित ६९ रनको उत्कृष्ट इनिङ खेले । उनका अलावा आसिफ शेखले २४ रन, गुल्शन झाले १८ रन र आदिल आलमले १६ रन जोडे ।
ओमानका बलर नदीम खानले चार विकेट, जबकि शुफिया मेहमुद र जितेन रामानन्दीले समान दुई–दुई विकेट लिए । १५२ रनको लक्ष्य पछ्याउन उत्रिएको ओमानले निर्धारित २० ओभरमा ९ विकेटको क्षतिमा ११३ रन मात्र बनाउन सक्यो । ओमानका लागि विनायक शुम्लाले ३२ रन र मोहम्मद नदीमले २५ रन जोडे ।
नेपालका बलरमध्ये गुल्शन झाले तीन विकेट, नन्दन यादव र सोमपाल कामीले समान दुई–दुई विकेट, र सन्दीप लामिछानेले एक विकेट हात पारे । यसअघि आजको अर्को खेलमा युएईले सामोआलाई ७७ रनले पराजित गरेपछि नेपालको विश्वकप यात्रा सहज बनेको थियो । उक्त नतिजासँगै नेपाल अंक तालिकाको शीर्ष स्थानमा उक्लिएको छ र आठ अंकसहित उपाधि नजिक पुगेको छ ।
नेपालले यसअघि सन् २०१४ र २०२४ को टी–२० विश्वकपमा सहभागिता जनाइसकेको थियो । यस वर्षको छनोट सफलतासँगै नेपालले लगातार दोस्रो र समग्रमा तेस्रो पटक विश्वकप खेल्ने अवसर प्राप्त गरेको हो ।
अब नेपालले सुपर सिक्स चरणको अन्तिम खेल शुक्रबार सामोआसँग खेल्नेछ । ओमान पनि शीर्ष तीनमा स्थान बनाउँदै विश्वकपका लागि छनोट हुने दोस्रो टोली बनेको छ ।
