दीननाथ बराल,
पोखरा २६, भदौं,
गत बर्ष सहारा क्लब पोखराले आयोजना गरेको २५ औं आहा रारा पोखरा गोल्ड कप फुटवल प्रतियोगिताबाट आम्दानीको २.४२ प्रतिशत अर्थात ३ लाख २१ हजार बचत गर्न सफल भएको छ । गत वर्ष माघ २७ गतेदेखि फागुन ९ गतेसम्म ११ दिन सञ्चालन भएको प्रतियोगिताबाट उक्त रकम बचत भएको क्लबले आज (शुक्रबार) पोखरामा आयोजित आय–व्यय सार्वजनिक तथा धन्यवाद ज्ञापन कार्यक्रममा जानकारी गराएको हो ।
प्रतियोगिताबाट १ करोड ३३ लाख २३ हजार ४ सय ८५ रुपैयाँ आम्दानी भएको छ भने ११ दिन संचालन भएको प्रतियोगिता सम्पन्न गर्न १ करोड ३० लाख १ हजार ६ सय ४६ रुपैयाँ खर्च भएको क्लबका कोषाध्यक्ष एवं अर्थ संकलन उपसमितिका सह–संयोजक लिलबहादुर थापा मगरले बताउनुभयो । बचत रकम पोखरा–१७, दोबिल्लास्थित सूर्यबहादुर केसी स्मृति सहारा आवासीय फुटबल एकेडेमी सञ्चालनमा उपयोग गर्ने उहाँले जनाउनु भयो । गेट टिकटबाट मात्रै ८ लाख ३३ हजार ५ सय रुपैयाँ आम्दानी भएको क्लबले जनाएको छ । प्रतियोगितालाई सफल पार्न मुख्य प्रायोजक हिमश्री फुड्स प्रा.लि.बाट ३० लाख १८ हजार ७ सय ५०, प्रदेश खेलकुद परिषद गण्डकी र पोखरा महानगरपालिकाबाट जनही १०÷१० लाख, सहारा हङकङबाट ५ लाख सहयोग प्राप्त भएको क्लवले जनाएको छ ।
यसपटक प्रतियोगितामा दर्शकको उपस्थिति अपेक्षाकृत कम भएकाले बचत रकम न्यून भएको क्लबका अध्यक्ष केशवबहादुर थापाले बताउनुभयो । उहाँले प्रतियोगिताबाट भएको बचत भन्दा पनि सहारा क्लबले सञ्चालन गर्दै आएको सुर्यबहादुर केसी स्मृति सहारा आवासीय फुटबल एकेडेमीलाई निरन्तरता दिनु ठूलो चुनौती बन्दै गएको उल्लेख गर्नुभयो । अध्यक्ष थापाका अनुसार सहारा एकेडेमी सञ्चालनका लागि वार्षिक करिब ५० लाख रुपैयाँ बजेट आवश्यक पर्छ। कठिन परिस्थिति तथा विपन्न परिवारका बालकहरूलाई आवास, शिक्षा, स्वास्थ्य र फुटबल प्रशिक्षण प्रदान गर्दै आएको एकेडेमी सञ्चालनमा क्लबलाई आर्थिक चुनौती रहेको उहाँले बताउनुभयो । एकेडेमीमा हाल १६ जिल्लाका ३० जना बालवकहरु रहेको बरिष्ठ उपाध्यक्ष पूर्ण बहादुर गुरुङले बताउनु भयो । बचत रकम उक्त एकेडेमी सञ्चालनमा उपयोग गरिने भएको उहाँले जनाउनु भयो । प्रतियोगिताको आम्दानीमा प्रायोजन, टिकट बिक्री, ब्यानर सहयोग, विभिन्न वडा कार्यालय तथा पालिका र संघसंस्थाबाट प्राप्त सहयोग, ब्याज आम्दानी लगायत समावेश छन् । प्रतियोगिताको संरक्षकमा पोखरा महानगरपालिका रहेको थियो ।
कार्यक्रममा पोखरा महानगरपालिका–९ का वडाध्यक्ष दीपेन्द्र मर्सानीले सहारा क्लबले लामो समयदेखि सहारा एकेडेमी र आहा रारा पोखरा गोल्ड कप सञ्चालन गर्दै पोखराको पहिचान निर्माणमा महत्वपूर्ण योगदान दिएको बताउनुभयो । उहाँले क्लबको अभियानलाई निरन्तरता दिन सबै क्षेत्रबाट साथ र सहयोग आवश्यक रहेको धारणा राख्नुभयो । मुख्य प्रायोजक हिमश्री फुड्सका कार्यकारी निर्देशक प्रकाश केसीले देशको विषम परिस्थितिका कारण फुटबलका दर्शक कम भए पनि खेलकुद विकासका लागि सहारा क्लबले प्रतियोगितालाई निरन्तरता दिनु प्रशंसनीय कार्य भएको बताउनुभयो । उहाँले खेलकुद क्षेत्रको विकासमा क्लबले पु¥याउँदै आएको योगदानलाई ध्यानमा राखेर आफूहरूले निरन्तर सहयोग गर्दै आएको उल्लेख गर्नुभयो । २५औँ संस्करणको आहा रारा पोखरा गोल्ड कप गत माघ २७ गतेदेखि फागुन ९ गतेसम्म सञ्चालन भएको थियो । प्रतियोगितामा ४ विदेशी सहित १२ टोलीको सहभागिता रहेको थियो । प्रतियोगिताको उपाधि आयोजक सहारा क्लवले जितेको थियो । विजेता क्लवले १४ लाख पुरस्कार प्राप्त गरेको थियो ।
