दीननाथ बराल,
पोखरा, २५ फागुन,
राष्ट्रिय आविष्कार केन्द्रका संस्थापक तथा प्रतिनिधिसभा सदस्य महाविर पुनलाई आज (सोमबार) पोखरामा आफ्नो जीवनीमा आधारित पुस्तक बिक्री गर्न भ्याई नभ्याई भएको छ । केन्द्र सञ्चालनका लागि आवश्यक आर्थिक स्रोत जुटाउने अभियान अन्तर्गत पुनले सोमबार पोखराका विभिन्न क्षेत्रमा पुस्तक बिक्री गर्नु भएको हो ।
पोखराको अमरसिंहचोक, पृथ्वीचोक लगायतका स्थानमा पुगेर उहाँले दिन भरीजसो पुस्तक बिक्रि गर्न भ्याई नभ्याई भएको थियो । स्वयं पुस्तक बिक्री गर्नुका साथै पाठकलाई हस्ताक्षर गरेर पुस्तक हस्तान्तरण गरी फोटो समेत खिचाउनु भएको थियो । पुनसँग भेट्न र पुस्तक खरिद गर्न सर्वसाधारण, विद्यार्थी तथा युवाहरूको उल्लेख्य भीड लागेको थियो। पुनका आफन्तका अनुसार सोमबार पोखरामा मात्रै करिब ७ सय प्रति पुस्तक बिक्री भएको छ । विद्यार्थीहरूका लागि पुस्तकको मूल्य ५ सय रुपैयाँ तथा अन्यका लागि ७ सय रुपैयाँ तोकिएको थियो । सोमबार पोखरामा करिब ४ लाख मुल्य बराबरको पुस्तक बिक्रि भएको उहाँका आफन्तले पोखरा क्लिकलाई जनाउनु भयो ।
हालै प्रतिनिधिसभा सदस्यमा निर्वाचित भएका पुनले केन्द्र सञ्चालनका लागि आवश्यक सहयोग जुटाउन आफ्नो फुर्सदको समयमा पुस्तक बिक्री गर्ने योजना अनुसार देशका विभिन्न स्थानमा पुगेर पुस्तक बिक्री गर्न थाल्नु भएको हो । यही अभियानका क्रममा उहाँ पोखरा आइपुग्नु भएको हो । निर्वाचनका वेला किताव बिक्रि गर्ने योजना भए पनि निर्वाचन आचासंहिताले नदिए पछि निर्वाचन पछि हाल किताव बिक्रिको लागि उहाँ आफ्नो अभियानमा लाग्नु भएको छ । पोखरामा पुस्तक बिक्रीका क्रममा पुनसँग फोटो खिच्नेहरूको समेत भीड लागेको थियो। सामान्य पोसाकमा चप्पल लगाएरै आउनु भएको पुनको सादा जीवनशैलीले धेरैलाई प्रभावित बनाएको देखिन्थ्यो । केही समर्थकले उहाँलाई पैसाको फूल लगाइदिनु भएको थियो भने कतिपयले फूलमाला र खादा ओढाएर प्रतिनिधिसभा सदस्यमा निर्वाचित भएकोमा बधाई समेत दिनुभयो ।
फोटो खिच्नेहरूको भीड बढेपछि पुनले सबैलाई पालो दिन आग्रह गर्दै छिटो–छिटो फोटो खिच्न आग्रह गर्नु भएको थियो । धेरै सेल्फी लिन खोज्नेहरूलाई उहाँले ‘सबैलाई पालो दिनुपर्छ’ भन्दै सम्झाउने प्रयास पनि गर्नुभयो । राष्ट्रिय आविष्कार केन्द्र सञ्चालन तथा वीरगञ्ज कृषि औजार कारखाना सुधार र सञ्चालनका लागि रकम जुटाउने उद्देश्यले पुनले आफ्नो जीवनकथामा आधारित पुस्तक बिक्री अभियान चलानु भएको हो । यसअघि पनि उहाँले देशका विभिन्न जिल्लामा पुगेर पुस्तक बिक्री गर्दै आउनु भएको थियो । उहाँले करोडौंको किताव बिक्रि गर्नु भएको छ । यसैबिच, भीड व्यवस्थापनका क्रममा केही असहज स्थिति पनि देखिएको थियो। एक व्यक्तिले ‘सांसद भएर पनि किताब बेच्दै हिँड्ने ?’ भन्दै असन्तुष्टि व्यक्त समेत गर्नुभयो । जननिर्वाचित सांसद किताव बिक्रि गर्न किन हिडेको मलाई किन धकेलेको भन्दै सांसद पुनलाई दुव्र्यवहार गर्दै भुईमा थुक्नु भएको थियो ।
