पोखरा, २३ कात्तिक,
पोखरा महानगरपालिका–४ मा अवस्थित प्रतिष्ठित शैक्षिक संस्था कुमुदिनी होम्स माध्यमिक विद्यालयले वार्षिक कार्यतालिका अनुसार आइतबार तहगत रूपमा नेपाली वादविवाद प्रतियोगिता सम्पन्न गरेको छ । आज सम्पन्न पहिलो चरण अन्तर्गतको आधारभूत तह स्तरीय प्रतियोगिता विद्यालयकी आधारभूत तह इन्चार्ज सजनी माजु श्रेष्ठको अध्यक्षतामा सम्पन्न भयो । प्रतियोगितामा कक्षा ७ ‘ख’ का आदित्य खत्री प्रथम, कक्षा ७ ‘ग’ की संस्कृति गैह्रे द्वितीय, कक्षा ८ ‘क’ की प्रतिष्ठा के.सी. तृतीय र कक्षा ७ ‘क’ की आयुषा लामा सान्त्वना स्थानमा रहेका छन् ।
प्रतियोगी विद्यार्थीहरूले “सहरीया जीवनभन्दा गाउँले जीवन प्रेरणादायी र रमणीय हुन्छ” भन्ने विषयमा पक्ष–विपक्षका तर्क प्रस्तुत गरेका थिए । उक्त कार्यक्रम कक्षा ६ की विद्यार्थी नस्विना गौतमले सञ्चालन गरेकी थिइन् । त्यस्तै, माध्यमिक तह (कक्षा ९ देखि १२) अन्तर्गत दोस्रो चरणको वादविवाद प्रतियोगिता शिक्षक मनबहादुर भुजेलको अध्यक्षतामा सम्पन्न भयो । यस चरणमा विद्यार्थीहरूले “वैदेशिक रोजगारी दीर्घकालीन समस्याको समाधान होइन” भन्ने विषयमा आफ्ना विचार प्रस्तुत गरेका थिए ।
प्रतियोगितामा कक्षा ११ (विज्ञान संकाय) की अञ्जली के.सी. प्रथम, कक्षा १० ‘ग’ का प्रतीक पौडेल द्वितीय, कक्षा ९ ‘ग’ की दिव्या आचार्य तृतीय र कक्षा १० ‘ख’ का सक्षम गैह्रे सान्त्वना स्थानमा चयन भएका थिए । कार्यक्रममा शिक्षक इन्द्रराज बराल, उमा पोख्रेल र दीपक के.सी. निर्णायकको भूमिकामा रहनु भएको थियो । शिक्षक श्रवणकुमार तिमिल्सिना र विशाल विक्रम बस्नेतको प्राविधिक सहयोगमा सम्पन्न उक्त कार्यक्रमको समन्वय शिक्षक सुरेन्द्र सदिच्छाले गर्नुभएको विद्यालयले जनाएको छ ।
